我是一個抑鬱症患者——我阿媽都有情緒病

文教 / 最新文章綜覽

 

 

早前我去一個從幼年便認識嘅朋友嘅喪禮,佢吊頸自殺的。係喪禮入面,見到大部分兒時朋友。講到兒時朋友,我地都係住同一個屋邨所以認識,而嗰個屋邨我自細就覺風水唔好,好多住係哩個屋邨嘅家庭都有問題,而且龍蛇混雜,認識到黑道中人係普通嘅事。而我嘅兒時朋友,剛巧全部都係不完整家庭中成長,而我一上到中一,9月18號就開始加入單親家庭系列。而這個暗黑嘅屋邨係好耐前拆咗。

 

童年時,係朋友眼中我個家庭係最幸福,有齊阿媽阿爸,獨生女,係窮但佢地錫到我燶。係表面上,我都覺我幸福過我朋友,因為生活上好多嘢都有父母照顧,但心理上有啲鬱結,我嗰時仲細,唔識表達,而且太過無形所以唔當佢係一會事,都唔想用佢嚟令人可憐自己。

其實我阿媽有情緒病,係我未讀幼稚園時我就見我媽想吊頸自殺兩次。當時我媽帶住我離開個唔生性嘅老豆,走去租板間房,即今時今日嘅其中一種劏房,嗰時真係好窮嘅人先會住。阿媽吊頸嗰兩次,我太細個,唔太清楚咩事,只記得個畫面都係包租公拖返我阿媽落嚟,而我就驚到係咁喊,應該由嗰時開始,我對我阿媽嘅感覺係好需要佢,但又好恐懼。

上到幼稚園,阿爸阿媽又係返埋一齊,原因就係為咗我,我阿媽決定返去哩個唔生性嘅老頭道。老實,由幼稚園到小學,我係有好多幸福畫面㗎,但係哩個咁窮困嘅家,又有個唔生性又老到就快退休嘅老公,個女仲天生頑皮反叛,對一個情緒病患者嚟講,真係久唔久就發作,但可惜嗰陣啲人對情緒病嘅認知接近零,我嗰陣仲細無可能知道佢咩事,我當時只覺佢有時情緒好失常,我好驚。從細就無乜安全感,個感覺好複雜,知道世上最愛我自己嘅就係阿媽,知道無論咩事,只要保護我,佢真係咩都做得出。

但佢嘅愛係有一種毀滅性。

有好幾次,阿媽面對我嘅反叛期佢情緒失控,佢唔知點好,直頭想殺死我後佢再自殺,要我阿爸阻止。有一次,我係街上曳,佢又情緒失控,直頭係街喊出嚟,我只是靜靜咁企係身邊不知所措,我唔識,唔知應該點,係學校、電視,甚至佢身上都無學過點樣對待情緒失控嘅大人,當時嘅我只不過係一個小學生……係條街道佢喊咗好耐,佢收聲嗰陣講咗句:「睇下,我係道喊咗咁耐,啲人經過都唔會問候一下。」的確,哩個城市啲人好冷漠,搵個人多事走嚟問下一個帶住個女企係街狂喊嘅婦女發生咩事都無,個個都冷眼望咗幾吓就咁經過,令我覺得好無奈、好心寒………………

待續。

 

P.s:最近係網上見到哩首歌,佢都係一個抑鬱症患者,歌詞係佢嘅自白。其實抑鬱症患者有好多無奈,唔係話睇下醫生食吓藥就得。

 

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192217
Date: 2019-04-07 04:28:31
Generated at: 2019-04-19 13:24:33
Permalink: https://www.vjmedia.com.hk/articles/2019/04/07/192217/我是一個抑鬱症患者-我阿媽都有情緒病