公司開咗FB,快啲叫你朋友同姨媽姑姐like 啦!

 

 

「公司開咗FB,快啲用你私人ac like同share啦!」腦細Michael說。
「好,我一陣like。」我說,心諗又要我做最討厭嘅事。
「叫埋你啲朋友呀姨媽姑姐一齊留言啦,比五星星呀!」Michael說。
「好,我試下叫。」我說。

我心諗做打手係要比錢㗎腦細,你知唔知啲假ac出面收得好貴,無錢就唔好學人做呢啲嘢啦,人工唔包出賣私人ac同朋友親人嘅ac㗎!所以其實我都係口頭附和下就算,如果佢再追問就話叫咗佢哋㗎喇,不過朋友未得閒寫/唔肯寫。

管理公司FB專頁又係一樣好煩嘅嘢,我係唔會用自己個私人ac去管理,一嚟唔想比腦細見到小盛女個page,二嚟腦細成日都會走埋嚟我部腦度睇住我襟嘢,好易就睇到晒啲私人嘢,好彩我整咗個假ac專係做嘢用,雖然係麻煩啲,但總好過無晒私隱。除咗FB,仲有IG、Tripadvisor、Wechat、Openrice,無數嘅social media platform,真係諗起都覺得好煩,我寫post當然無問題啦係我嘅job duties,但唔好再搞我個私人ac喇喂。

細公司嘅人事的確係無咁覆雜,但就無乜budget,淨係請一個marketing就覺得可以搞掂晒所有嘢,雖則我都知Marketing根本係一個打雜,乜都關marketing事,所以除咗marketing嘅一堆工作之外,我仲要招呼客人啦、sell下嘢啦、admin啦,撈埋清潔啦,基本上都一腳踢㗎喇,好彩平時都有做過下家務,但我最唔鍾意嘅係要倒垃圾。

話說我要將啲垃圾拎去大廈後樓梯一個位倒,第一次我唔知喺邊就問個看更,然後我就戰戰兢兢咁行落去倒,之後個看更好好人,佢提我話下次綁實啲袋垃圾,凌空掉落去好喇,佢話呢度好多蛇蟲鼠蟻走來走去,驚嚇親我,我當時已經心知不妙,然後有日我又去倒垃圾,點知一開門就見到四腳爬爬,嚇到我即刻急剎chok親條筋。

「靚女!」舊同事阿May大喊。
「Hi,咁岩嘅。」我說,好不幸我係拎住袋垃圾,有時人生就係咁黑仔。
「點呀你去咗邊度做嘢?」May說。
「就喺上面嘅office咋嘛。」我說。
「咁慘要阿四嘅。」May說。
「咁呢度有其他嘢好嘅。」我說,心諗想我點答呀大佬。
「Oh really?得閒返嚟探我哋啦,拜拜。」May說。

其實我份人呢就真係無乜志氣嘅,呢度人工高咗、工時短咗、大假多咗、福利好咗、加班又少咗,咁我都真係唔介意要倒下垃圾嘅,不過唔多講啦,費事佢返到舊公司又唱通街,所謂食得咸魚抵得渴,其實每份工都有佢好同唔好嘅地方,衰嘅咪呻下,見招拆招,最緊要自己知自己做緊咩就得喇。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192246
Date: 2019-04-07 22:45:00
Generated at: 2019-04-19 13:26:54
Permalink: https://www.vjmedia.com.hk/articles/2019/04/07/192246/公司開咗fb,快啲叫你朋友同姨媽姑姐like-啦!