我是一個抑鬱症患者——細個我阿媽賭馬輸左就會鬧我

文教 / 最新文章綜覽

 

 

其實有啲被情緒困擾者唔係話外來環境造成,而係佢地自己攞嚟,即是如果自我管理得好,絕對可以避免自己陷於困境,同負面情緒玩遊戲。

 

今日繼續講我阿媽,佢凡事為家人想多過為自己想,尤其係我,我絕對係佢嘅命根,為咗我咩都肯制,佢嘅人生係以我為首。可是,佢好學唔學跟個同事學賭馬,但佢地啲婦孺又咩都唔識,無去學刨馬經求其見個馬名好意頭就買,放工就開大個收音機係咁「上上上上……」,真係以為咁嗌隻馬就會聽到會發奮衝線咁…………之後問題就嚟啦,輸錢皆因贏錢起,贏過少少被嗰種快感吸引,賭癮就會越玩越深。

賭馬、賭馬,有個「賭」字即係無可能一定贏啦,試問一個唔識做功課、唔會去刨馬經嘅人又點會可能賭馬會贏丫……輸馬就梗係失落,輸得越多次,輸嘅錢就越多,情緒就會跟住越嚟越差,我就慘啦~當時應該四年級左右,以前嘅屋邨小朋友夜晚都會落街玩嘅,但小朋友始終唔可以太夜歸,9點返到屋企阿媽就係道「上上上上」梗,開電視都無可能聽到啲演員講咩,咁咪自己同自己玩囉,玩咩?唔記得啦,總之就玩啲同阿媽鬥嘈嘅嘢啦~阿媽一輸馬,就將佢嘅情緒發洩係我身上,話我嘈輸佢喎,當時嘅我真係以為自己錯㗎,而且又有種委屈感,但我天生貪玩反叛,你唔俾我就硬係想挑你機嘅。

受罪咗多次,有一次到我委屈夠啦,到我爆啦~我屋企係非一般屋企,無分男女老幼,總之邊個啱就邊個可以發聲,所養育咗一個無大無細敢言嘅我出嚟。講返當晚,我好記得嗰段我爆嘅說話:「鬧鬧鬧,你又唔俾我出街玩,我小朋友嚟㗎!玩就梗係會出聲㗎啦!你輸馬就搵我嚟鬧,你以後都唔准賭馬呀!」哩一爆當然我贏咗,阿媽係嗰刻明白佢嘅情緒受到賭馬影響然後受難嘅係我,佢係唔會容許自己個女受傷㗎,所以佢答應唔賭,我知佢有偷偷地買馬㗎,但佢無搵我嚟搞咪扮唔知囉。

 

諗返起,如果係其他家庭,一個女兒咁樣爆阿媽通常都死硬,好好彩哩個由我阿媽主導嘅屋企,真係邊個有理邊個就可以發聲。啲大人成日覺得小朋友無決定嘅權利,咁樣小朋友先會承受晒啲大人嘅壓力,對於大人嘅情緒都係硬食。對於小朋友嘅心靈健康,大人絕對要注重小童權益,咪以為小朋友細個就無決斷能力。

講返情緒受困,睇新聞、自己又接觸過,有好多賭癮重嘅賭徒最後因為輸太多、欠債太多而走上不歸路,其實係有方法解決㗎,好彩嗰啲會搵啱對像求救成功,唔好彩就自己困自己入困境,想唔通咪俾情緒帶住走,唔敢去求救,就咁樣完結自己。其實管理好自己嘅生活,唔係話一定要好刻板咁生活,但唔好俾自己沉淪,就算你有情緒病都唔會被激發起去另一個層次嘅痛苦。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192274
Date: 2019-04-09 05:25:53
Generated at: 2019-10-19 04:13:00
Permalink: https://www.vjmedia.com.hk/articles/2019/04/09/192274/我是一個抑鬱症患者-細個我阿媽賭馬輸左就會