我冇唔比你做啊,不過你會激嬲我囉

 

我個FD有一個女朋友,經常都話自己好講道理,但只要唔合佢心意佢就會要我個FD生不如死。

以前我個FD喺自己屋企鍾意坐邊就坐邊,瞓喺梳化打機又得,喺床用電腦做嘢又得。但自從佢女朋友搬咗嚟住之後成日都招呼佢啲朋友上嚟玩,唔單止侵犯咗我個FD依個戶主唔少空間,有時連梳化都冇位佢坐,想坐客廳地下都比女朋友話佢阻住條路。我個FD有同依位女朋友反映過,但佢又話每日只係固定叫三個朋友上嚟玩,個個都經佢批准過又係自己人,叫我個FD包容下佢地咁話——雖然間屋明明就係我朋友嘅。

有一日,我個FD終於頂佢女朋友唔順,佢決定工都唔返,全日瞓喺客廳嘅地下,要捍衛返自己嘅地方,想日後嘅決定都由大家投票咁話。佢女朋友嘅朋友話我個FD一啲都唔好客,話如果唔係佢地成日上嚟玩,我個FD同佢女朋友一早就完蛋咁話。結果佢女朋友當然發哂脾氣,話我個FD咁樣做好錯,唔應該影響過嚟玩嘅人嘅心情,更加唔應該阻住條路——雖然間屋明明就係我朋友嘅。

經過咗一段時間嘅抗爭,我個FD失敗咗,仲要比佢女朋友嬲埋。佢女朋友唔單止搵埋自己啲朋友一齊去鬧我個FD,佢甚至喺屋企拎住把雞毛掃指住我個FD,問我個FD知唔知錯,點解傷害佢同朋友們嘅感情。我個FD話佢只係別無他法之下先要出佔領客廳依個做法,希望比佢女朋友知道佢嘅決心,亦都希望女朋友可以聽下佢嘅訴求。點知佢女朋友就爆咗句金句出嚟:我唔係唔比你表達你嘅意見,但你唔應該做得咁偏激囉——但我個FD曾經同佢好聲好氣講咗好多次,不過佢唔聽。

最後我個FD有咩下場?我唔知住,不過我曾經同佢女朋友講過「我個FD都只係想表達佢意願比你知」,不過佢又用另一句金句答我:「我冇唔比佢做啊,不過佢會激嬲我囉」

佢真係好撚仆街。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192297
Date: 2019-04-10 03:42:43
Generated at: 2022-12-09 16:16:34
Permalink: https://www.vjmedia.com.hk/articles/2019/04/10/192297/我冇唔比你做啊,不過你會激嬲我囉