【塔羅個案】其實英文唔好真係唔駛夾硬用,例如「Friend with benefits」……

文教 / 最新文章綜覽

 

語言係好博大精深嘅,就算大家常用嘅廣東話,淨係句尾感嘆詞唔同,都已經可以有唔同意思,例如「係咩?」即係你對對方講嘅野有所懷疑,「係喎!」就代表你對對方講嘅野相對認同。

咁英文又點呢?唔好講咩香港係國際大都會啦,就算幼稚園已經開始學英文,不過喺條街度有外國人用英文同你問路,可以反應極快地流利回答嘅人又有幾多,相信大家都心中有個譜。咁無野嘅,唔西望太平洋,而家個經濟形勢,你北望神州學好普通話,一樣可以殺出條血路。

不過,如果你唔算特別擅長使用某種語言,又要夾硬用,結果用錯,仲要柒到成公司都知,咁又點收科呢?

今次嘅故事其實唔算係個案,因為係由客人同我分享的職場趣事;客人本人後生能幹,黎問工作,想知自己手頭上嘅新 Offer 到底係咪真係值得轉。

咁佢口中嘅趣事又係咩呢?

話說一般公司同事都會有個 Whatsapp Group(或者其他通訊媒體群組)方便聯繫,無論係請 Sick Leave 抑或有活動問大家幾點集合,感情好啲嘅可能會約出黎食飯飲野……咁,呢個世界咩人都有的,就算平時喺公司做野正唔正常都好,去到做朋友,夾唔夾,都好講緣份。

客人,稱呼佢為 May。May 個公司 WhatsApp Group 人數有十人左右,都係 Teammate 以及一兩位已離職舊同事。大家關係算唔錯,個 Group 都會偶爾反下老細白眼,或者 Share 下邊間餐廳有 Discount 咁。

當中有一位女同事,有一日,Send 左個咁嘅 Message 出黎。

「我想問下有無 Friend with benefits 有 xxx 嘅 Discount 或者會員卡,我想要」,後面加一個馬騮掩眼 Emoji。

個 Message,好快變成藍剔,你想像下一個 10 人嘅 Group 都可以咁快變藍剔,即係全部人都睇哂,但係,無人出聲。

Team Head,係位中年女子,佢 Typing 左幾次,但係始終講唔出口。

然後,阿 May 當時同另一位同 Group 嘅同事買緊野,佢地睇完短訊,對望,發呆。

「佢係咪唔知 FWB 點解?」同事怯怯咁問,「駛唔駛提下佢?」

畢竟,個 Group,大部份人熟啫,都仲有一兩個唔熟,以及事非精喺度。May 雖然覺得好柒,都係私底下 Message 呢位「搵 FWB」嘅同事。

「喂喂,其實 FWB 即係 SP…Sex Partner 咁解…你咁打個 Message 出黎好似有啲唔係咁好(哭笑不得 Emoji)。」

點知。

「我相信英文好嘅人會明白我唔係咁嘅意思囉,anyway thz」

May 同我講到呢度,反左個白眼,「我喺英國讀左七年書,比人話我英文唔好。我要好好檢討。」

而我,笑到收唔到聲。

十分鐘過去,個 Group 有位男同事都忍唔住出聲,「喂你喺度搵 FWB 咁爆?LOL」

二十分鐘過去,May 喺 Group 以外嘅同事手上收到「FWB」短訊嘅截圖,短訊內容係「佢認真?」

無錯,呢件事,或者咁講,呢件柒事,好快喺公司入面傳開;May 同我講,「我提就提左,人地唔聽,咁可以點?」

去到第二日,阿 FWB 同事應該都知道自己真係柒左,同埋大家都好肯定佢係唔知「FWB」係點解先會咁寫,雖然佢喺 Group 入面個短訊佢自己 Delete 左,不過,截圖嘅野,一 Click 永留存,襟過鑽石。

然後,FWB 同事,話其他人杯葛佢喎。

咁又係嘅,畢竟 FWB 同事平時都以自己「讀書唔差見多識廣」自居,今次一子錯,又真係難啲落台。不過,呢個故事就教訓大家,有啲 Slang 真係唔好亂咁用喔⋯

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192352
Date: 2019-04-10 22:08:40
Generated at: 2019-06-24 20:51:26
Permalink: https://www.vjmedia.com.hk/articles/2019/04/10/192352/【塔羅個案】其實英文唔好真係唔駛夾硬用,例如