我是一個抑鬱症患者——對住人可以好「正常」,獨處就奶野喇

文教 / 最新文章綜覽

 

 

「你自己都唔幫你自己,無人幫到你」、「你要堅強自己內心,咁樣去面對…………」、「唔好理啲唔開心嘢啦」、「都唔知你咁緊張做咩,放鬆啲」、「咁緊張無錢收㗎」etc ……哩啲說話對我嚟講真係一把把鋒利嘅刀,無去駁回哩啲說話,知道佢地真心唔明,而佢地本意係好嘅,我又點能夠唔原諒,但真係hurt到我爆,如果係我情況最差嘅時候聽,真係「有咩留返拜山先講」啦~

 

我無刻意隱瞞自己係一個抑鬱症患者,都唔會咁勇去公開,但係有對身邊自己重視、經常接觸、信任嘅朋友講過,甚至求救,我係想生存先會咁做。其實現今社會對情緒病、精神病仍處於一種封建嘅態度,就算科技發達,網上已經有好多相關資料流傳,但有幾多人係會真心去睇嗰啲內容?有幾多會真係想去了解?好似豬鏈球菌咁,無發生係我身上,身邊人無感染,對我無乜影響,我只係會知道係幾危險,食豬小心啲,唔會去搵資料睇。

所以我好明㗎,社會上無咩人正視情緒病、精神病係唔正常地正常㗎。點解唔正常地正常?哩個人口咁密集、生活咁複雜,連搵個空間俾自己冷靜透氣都難嘅香港,受情緒困擾、有情緒病、有精神病真係好普通嘅事,佢地帶住個附合世俗標準嘅表情面具係社會生活緊,我話你知總有一個係左近其實一啲都唔誇張,即係日日都有一個係你身邊經過甚至你識喎,唔去了解關於精神健康知識係幾咁唔正常地正常咗呀~佢地隱藏病症嘅程度就算佢地病發緊,你地咪以為佢EQ低,甚至拋低一句「痴線」就由佢。

當然情緒病唔可以俾人用嚟野蠻嘅值口啦,但一個明白自己受情緒困擾、情緒病患者每一次情緒失控都會好自責,佢比你地更憎佢自己,好憎控制唔到嘅那個「自己」。所以多時佢地會選擇摺埋,怕自己搞到人,令人地討厭,然後胡思亂想,越想越悲,承受壓力低到你唔會理解嘅低,所以容易緊張,緊張就亂,亂就慌忙,之後做嘅嘢完全掌握唔到,咁咪容易錯、容易躁、容易你地認為嘅「EQ低」囉,然後就無限輪迴,問你死未?好似好誇張,我寫嘅都仲係處於輕微狀態,大佬都仲未見到呀~到咗佢打大佬嘅時候,你地更加睇唔出呀~對住人嘅時候佢地會無視嗰種感覺,自己呃自己,所以對住人會有講有笑,仲會笑得好開心,甚至開心得癲狂,但獨處嘅時候就賴嘢啦,所有情緒會發出嚟,當無嘢發洩就會發洩係自己身上,再推自己去深谷,見血都還好,因為佢條命仲係道,如果佢意識到自己上唔返嚟,就只係一刻,佢就真係離開人間上唔返嚟………………哩啲嘢,自己未經歷過又點講得出呢~

 

我明白,好了解一個正常人係因為好唔了解所以先會講啲傷透人嘅正能量說話,亦都知道好多人以為正能量係對人好、係善意,我真係理解。有追睇開嘅都會睇得出我上次講我阿媽嘅病情我遲遲都未有寫落去,原因係係我大約小學四年班都有對過我阿媽講過一啲正能量大道理,我都有份將我阿媽推向谷底,我都係兇手之一………………所以那將會是我最難寫嘅一篇,會將我自己挖穿再推向深谷嘅一篇,所以俾時間我,等我夠強嘅時候,我就會寫。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192364
Date: 2019-04-11 05:00:07
Generated at: 2019-06-24 20:52:59
Permalink: https://www.vjmedia.com.hk/articles/2019/04/11/192364/我是一個抑鬱症患者-對住人可以好「正常」,