我是一個抑鬱症患者——「你是一個怪女孩」

文教 / 最新文章綜覽

 

「你是一個怪女孩」,曾經有一個朋友咁樣形容我。係一個自由思想嘅家庭長大,細細個就好隨心,唔係想激死阿媽搵生拜,但我都控制唔到,覺得有啲嘢你講得好有道理,但我自己唔試過又點會叫到自己死心,連我自己去說服自己嘅方法,都係要去試,遺背自己個心真係一件好難、好痛苦嘅事。由心去說話、由心去做事,可以講話直腸直肚、橫衝直撞。就係咁所以比一般人容易衝撞到人而後知,因為就算世界話我係聰明都好,個心係行得快過個腦,幸好自問心地唔壞,如果唔係真係個人可以無人緣啦…………

但別忘記我係一個抑鬱症患者,其實抑鬱哩個跡象係我小學就會搵到,會無啦啦情緒低落,少息會自己一個坐埋一邊發呆,有同學係我背後講我壞話話我成日發夢,佢地都唔知我咁樣反而舒服過夾硬去埋堆。係IVE我試過無啦啦問身邊以為要好嘅同學:「你有無試過,無啦啦會唔開心?唔知點解個心就突然好低落」佢無理我,HEA我話無就算。個人直接、橫衝直撞、問埋啲怪問題,其實好多人會選擇避開。有時佢地唔去避開,只不過我仲有利用價值,用完就可棄掉,而我可以被利用嘅有限,所以好快就會棄掉我。

另外,係我病情反複,失去自控情緒能力嘅時候,將人嚇走係易事。更有人,無論我之前幾用心對佢,佢都可以過橋抽板,將我缺點放大成罪行,話我之前嘅幫忙唔關我事,順理成章將我排擠在圈子外,佢繼續係好人。我就好似一個腹黑磁石一樣,吸引咗唔少哩類腹黑嘅人,負上不少罪名。你問我有無錯,當然有,但唔會係佢地講嘅咁。因為好似我哩啲由心出發嘅人,腹黑就會好快被拆除,無朋友嘅生活我係生存唔到,我又點會係佢地講嘅仆街。

經過好多次嘅傷害,其實個心已經破碎到無法完整,但我就死都唔信邪,只要用心對人,總有人會識欣賞。遇上好人,如果我有時又因為控制唔到情緒令對方難受,就係會死都去捉對方回來,要俾對方知道,我係有心交換心,唔係話我背景和過去比一般人可憐就隨便去攞人地嘢,我係會感恩,你對我所做嘅會有回報,請唔好離棄我,我會受不了。

我係一個怪女生,一個聽從內心而行嘅人。率真、直接、橫衝直撞,做法唔係人人受到,但我做錯要話俾我知,我知道每人接受嘅程度唔同,只要你講就可以的了。如果你係腹黑嘅,有人話過我敏銳,你最好唔好接近我,都唔好嚟搵我攞著數,因為好多經歷令我對哩種人好痛恨,我自己都控制唔到會做咩同你對抗。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192440
Date: 2019-04-13 05:02:07
Generated at: 2019-06-24 20:49:19
Permalink: https://www.vjmedia.com.hk/articles/2019/04/13/192440/我是一個抑鬱症患者-「你是一個怪女孩」