紋身

 

 

好朋友 Kate 剛自韓國回來,聽聞她今次一個人出走,是為了那段只有 100 日、沒有結果的感情療傷。

自從失戀後就避開不見人的她,這晚,終於約我出來 happy hour。

我:「你去韓國,唔係為咗佢整容吧?」

Kate:「佢話我笑起上嚟好屈機,所以應該唔駛整住。」

我:「不如講下你同佢?」

 

**********************************************************************************

 

好多時兩個人坐埋食餐飯,大家好努力搵話題搵嘢講,天南地北,成餐飯完全無 dead air,但係食完飯返到屋企第二朝瞓醒,就好似睇完一套無聊劇集,你唔會好記得大家講話嘅內容,亦唔會覺得彼此認識深咗。

相反,有啲人坐埋一齊,只有一兩個話題,甚至乎一餐飯兩個鐘有唔少靜咗嘅時間,但係兩個人都可以好自在咁笑,食完飯仲有好多嘢想講,難捨難離;第二朝瞓醒,你仍會驚訝大家好似識咗好耐,有好多相同嘅地方,又原來有更多不相同但又互相啟發到嘅諗法。

我同佢屬於後者,鍾意嘅感覺,應該就由此刻開始吧。

佢個性陰晴不定,難以捉摸。有時溫柔體貼、有時冷漠、有時仁慈善良、有時不近人情,又有一個溫柔敏感嘅心,想要真正了解佢,唔係一件容易嘅事。但偏偏女人就係流住自虐嘅血,越係唔容易,越想去做,唔單只要做,仲要做到最好!可能就係因為咁,我對佢越踩越深。

佢曾經講過,心裡面有一份搵女朋友 checklist,「有沒有將來」係 checklist 首項。這一點我反對,我從來都認為「愛」係唔可以用一張清單去衡量的!

同一個問題,佢問咗我幾次:「其實你鍾意我咩?」

我答:「唔知呀!我淨係知道自己好鍾意、好鍾意、好鍾意、好鍾意、好鍾意、好鍾意你!」

明顯地,佢每次都唔滿意我嘅答案!

最後一次佢問:「實在我同你無經歷過甚麼深刻事情,究竟你有無問過自己鍾意我咩?」

我終於鼓起勇氣反問:「可唔可以唔返英國?」

他:「之後呢?」

我:「點解唔可以行咗第一步先?」

他:「有無將來對我嚟講好重要,如果連我自己都比唔到承諾自己,點同你行第一步?」

那天,在機場。

我:「生日快樂。」

他:「多謝,不過下星期先係喎。」

我:「你今年生日願望可唔可以送比我?」

他:「可以,你想要咩?」

我:「先等下星期,再許願。一路順風。」

其實應該點樣去衡量一份愛呢?我同佢「相處」(甚至連拍拖也稱不上)只有短短 100 日,原來只有 100 日也可以牽腸掛肚;原來只有 100 日也可以明知沒有結果,還是樂於默默守護,無怨無悔。

 

**********************************************************************************

 

我:「你寧願一齊咗之後分手?定無一齊過?」

Kate:「有咩分別?」

我:「對你嚟講,邊個更遺憾?」

Kate:「無遺憾,我生命完整的剛好。」

我:「你許咗個咩願?」

Kate:「願,把我餘生一半的幸運給予他,祝他幸福快樂、永不寂寞!」

(嘩!太型了吧?我答唔上嘴喎!)

Kate:「放心啦,去完韓國返嚟,心情輕咗好多喇。」

我:「你去韓國攪咩嚟?」

Kate:「紋身。」

(我張開嘴,再一次答唔上!)

Kate:「紋身嘅痛好刻骨銘心,但係我感覺到自己一邊痛一邊得到釋放,釋放咗啲負能量同唔開心。紋身師同我講『紋身可以毫無意義,但有啲人,就係能夠將紋身視為一個小小橋樑,與忘不了卻遠去嘅人和事,繼續保持溫度』。」

我:「你唔怕自己後悔?」

沿途紅燈再紅 無人可擋我路
望著是萬馬 千軍向直衝
我沒有溫柔 唯獨有這點英勇

我:「救命!咁你紋咗乜嘢?」

記得我們分手那天,在往機場那程車上,你戴著右邊我戴著左邊 airpods,你點播給我聽的那首歌嗎?我將頭四句歌詞變成簡單圖案,再加上你中文名,紋咗喺我心上面。

 

 

作者:沒有句號

沒有句號
在職媽媽,出來社會工作超過20年,見證了人性的可愛與可恨,很想把這些故事寫下來。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192503
Date: 2019-04-13 05:22:35
Generated at: 2019-06-24 20:52:51
Permalink: https://www.vjmedia.com.hk/articles/2019/04/13/192503/紋身-2