【嗚巴軼事】「不如我俾返個15蚊你!」

 

 

大台自今年農曆新年後推出乘車優惠,只要係特選客戶(幾乎人人都係),係指定日子同時間叫車時輸入優惠碼,就會獲得十元不等嘅折扣優惠,仲係每程車(同一程車去三個目的地都計一程)都可以用一次。

今晚我係青衣接左個客E先生,目的地係觀塘曉光街。甫上車,佢就打返屋企報平安,順道問家人到家中探訪嘅長輩是否已經離開回家。由於長輩當時正準備離開,E先生又希望幫長輩叫車回家,於是問我:「師傅,請問可唔可以幫我係觀塘車老人家返樂富?」咁我當然係「官方地」答佢叫佢自己加目的地,殊不知佢答我「可唔可以落車個陣再叫一次由觀塘去樂富?」

咁我答佢,「其實做埋呢單都收工,如果係就加多個目的地,咁我做埋就收工。」點知佢話:「我重新再叫一次就可以慳多15蚊。」我話:「其實我都停止咗接受新預約,再開返都唔係問題。不過會遇到以下情況:1. 到曉光街之前如果響機我就要接單,因為我都要計接單率,變相完左呢程我都要你落車;2. 就算冇單都好,你再叫車都未必派到張柯打俾我,隨時你要chok幾次先叫得返我。」

不過,E先生好糾結個15蚊優惠,至少係車廂嘅空氣中我讀到咁嘅氣味。而且佢仲將個15蚊掛係咀唇邊,彷彿爭個15蚊連開飯都成問題咁。我心入面不期然瘋狂彈出呢句說話:

「不如我俾返個15蚊你!」
「不如我俾返個15蚊你!」
「不如我俾返個15蚊你!」

我強忍住句說話冇講出口,費事講出黎串親佢唔係幾好。然後我同佢講,「不如咁啦,我照幫你車老人家返去先收工,咁你自己隨心係個app度俾啲小費啦。(筆按:app內俾嘅小費不用跟大台拆數)」咁E先生當然冇問題啦,仲問我收幾多先啱。而討論呢個小費問題個陣,佢仍然念念不忘個15蚊優惠,因為點都要計返個15蚊先覺得著數嘛⋯⋯

我明嘅,香港地,有優惠邊個唔想扭盡六壬黎用盡佢?但係叫得車嘅,又唔係爭個十零銀錢啦,冇謂搞到自己cheap哂呀⋯⋯

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192475
Date: 2019-04-14 04:35:45
Generated at: 2019-04-19 13:24:57
Permalink: https://www.vjmedia.com.hk/articles/2019/04/14/192475/【嗚巴軼事】「不如我俾返個15蚊你!」