《無雙》可能係莊文強嘅自high 之作

 

終於,的起心肝喺itunes花咗38蚊租咗前幾個月成為熱話嘅《無雙》嚟睇。既然已經事隔幾個月我就suppose大家睇咗,又或者其實無興趣去睇,所以以後嘅文字,隨時都有可能係劇透,不便之處,敬請原諒!

睇完《無雙》之後,第一時間諗起嘅係自己當年大學一份為咗交功課而創作嘅小說,故事入面九成九章節,我都用咗第一稱「我」嚟寫作,而當中男主角一直都係用iphone(手機係呢個故仔入面佔好重要位置)。但去到最後一章,只係短短唔夠100字,我改咗用第三人稱,即係全知視點,然後男主角改用andriod手機。

之後,我就時不時拎個故仔去畀人睇,然後問人哋覺得最後其實係點。有人答平行時空、有人答發夢,有人答其實之前啲嘢係假等等。但最重要一點,係身為創作人嘅我都唔知係點,只係覺得加咗會令個故事升華咗,成件事好似勁啲。如果有啲讀者講到一啲超出我想像過嘅可能性,我仲會更加high,我係完全信仰「作者已死」。大個咗睇返,就會諗當時自己寫個咁嘅故仔,其實係咪為咗自high?

我唔知道莊文強係咪同我一樣,等緊觀眾為佢呢個故仔講出更多可能性,甚至「過度詮釋」都可以。畢竟,我唔會,亦唔可能將自己呢啲九流創作同金像編劇比擬。但我完全能夠理解,創作人對於用手段令個故仔變得唔一樣,然後令故仔更升華,一定會好興奮。甚至衰啲講就係自high,我覺得爽,關你哋睇戲嘅乜_事!

當然,《無雙》無可能係畀佢一個人自high嘅作品。一個聲稱收埋咗10年嘅故仔,加埋投資方畀咗咁嘅陣容,投入咗咁嘅資金,《無雙》必須係一部大賺嘅商業片。結果,香港票房過4,000萬,大陸票房近15億人民幣,成為最收得嘅香港電影,亦令大陸人重新燃起對港片嘅興趣,認為熟悉嘅港片終於回朝。或者,呢個可能先係大家覺得最吊詭嘅地方。

而當我睇完成套戲,我覺得製作偽鈔,食大茶飯嘅類犯罪片都只係引子,當然入面嘅資料,同埋將整偽鈔搞到勁專業係好引人入勝,亦都好有當年《門徒》嘅影子,不過都係引投資者嘅手段(發哥雙槍重演觀眾眼前都一定係)。故事可以駁故嘅地方好多,最離譜係「殺畫家」個場槍戰,兇案現場竟然可以多咗一個人而完全無疑點?Are you fu_king kidding me?難怪有評論人話其實李問嘅版本都係假,查案呢件事都係假,成套戲都係假。可能唔少人睇完套戲,都會係當年方力申係美女廚房嘅心情—「部戲假架!」

不過,你都唔可以否認《無雙》係近幾年最有誠意嘅香港電影,無論鏡頭、剪接、配樂,演員演出都係近年港片其中一部佳作。好多場口我都睇得好爽,好舒服,呢個亦係我好耐未喺香港電影入面感受過。問題係,劇本嘅硬傷會唔會令你扣哂前面個啲部份累積嘅分數。

《無雙》嘅野心好大,所以大到有啲失控。但如果你拆細啲睇,查實個故仔只係一個痴女遇上一個由無名小卒變成「主角」嘅痴漢,看似深情,但係諗落都幾痴線(尤其最後真阮文話李問只係鄰居,連阿王咁嘅樣都要做痴漢,真係好痴線)。唔好誤會,我完全無貶義,甚至去到最後我覺得張靜初做嘅假阮文,喺酒店個一段仔,點起支煙之後流淚,其實令我好心噏。因為,佢雖然同樣被李問所「創造」,但佢始終唔係真,亦唔會真係得到李問嘅愛。最痛心嘅係,嗰個「真品」只係佢鄰居。

呢個或者就係套戲講到嘅嘢,有啲假嘢,係人見人愛,例如假鈔。但套用係人身上,sorry呀,就算你有張靜初咁正(話說佢戴住黑bra個段真係睇到我都好high),既自動獻身,又為你做咁多嘢,但你都係不及一個鄰居,假的真不了。

在於觀眾立場,《無雙》可能係部眼高手低嘅電影。但在於同樣係創作人而言,我覺得係個好好嘅挑戰,不論成品係點,做到係會好開心。所以,我都會繼續創作自high故。如果做咗嘅嘢連自己都唔high,試問又點可能繼續做到落去呢?

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192600
Date: 2019-04-15 04:53:57
Generated at: 2019-04-19 13:27:49
Permalink: https://www.vjmedia.com.hk/articles/2019/04/15/192600/《無雙》可能係莊文強嘅自high-之作