我是一個抑鬱症患者——咩係panic attack?

文教 / 最新文章綜覽

 

首先講下我點解要寫哩個系列,從來都無去講點解要寫。有啲嘢係要以過來人嘅身份講先夠說服力,所以我就以一個情緒病患者身份去話俾大家知情緒病係啲乜,患者會有啲咩感覺,令到更多人關注精神健康,夠說服力啦~另外,就係以我哩個抑鬱症患者身份更加夠力話俾無知嘅人知,就算受到情緒病嘅影響我地都會好努力咁生存,應該話比一般人更努力,咁先可以俾人感覺到我地好似正常咁生活,即係你地有時重感冒都會照常返工同一個道理咁解。更加希望藉着個人故事,話俾一啲患者知點樣面對哩個病嘅困苦,唔會完全好返,但至少係有方法去康復,我地都值得擁有快樂㗎~仲有一樣,由我哩個抑鬱症患者去鬧爆有病嘅唔係大晒,夠晒資格啦~唔知追睇開嘅人有無發現,有啲關口我係衝破唔到去寫,如果有日能夠寫到,內心一個缺口應該可以修補,甚至強大到自己心靈(我係咁認為)。

早前認識幾個同路人,然後做咗好友,有一次聚會,我就問一下panic attack係咩嚟嘅,以前經常係一啲關於精神健康嘅group 見人地話有panic attack,覺得應該係幾痛苦嘅感覺。朋友解釋最能形容到panic attack就係驚恐感覺,而且仲會影響到呼吸、心跳及聽覺等。唔聽尤自可,原來我真係好無知,對自己病情唔係好了解(掩面),原來自己感受過好多次哩種反應,只係近來環境好轉咗,所以都有一段時間未感受過(但好驚哩個環境維持到幾耐)。

記得第一次panic attack係多年前一個平安夜放工返屋企嘅路上,係街上唔係一對對嘅情侶就係一家人開開心心咁經過自己身邊,就係佢地放閃嘅時候突然心跳亂而且心口好痛,個人好暈,呼吸都變得唔順,覺得係街上會隨時暈倒咁。就係嗰次,我就好驚平安夜係街上,無奈唔係公眾假期要返工,唯一方法係設計好返屋企路線,避開會感受到節日氣氛嘅地方,盡量將嗰日過得好似平日一樣,然後快啲返到屋企哩個comfort zone 。有另一個節日都係令我恐懼,就係中秋節,不過哩個節日嘅機票唔會好貴,所以通常我唔係去咗外國就係飛機上,避開咗節日氣氛,旅行真係其中一個救到我嘅方法(順便扮曬命當報復啲人放閃)。

以前病情比較嚴重嘅時期,panic attack真係會無定向咁敲門,不請自來,點解會嚟我都唔知,無啦啦驚囉,驚咩唔知呀,個感覺好驚囉~其實仲有一個原因佢會嚟搵我,就係壓力,早幾年受到工作人事壓力,因為政治及一啲想法不和,所以受到某男同事針鋒相對(係呀男人仆街上嚟衰過大媽㗎),連呼吸都好似係罪每件事都被佢單打,周圍同人講我是非,而且扭曲我所講所做嘅,目的就係證明佢自己乜都啱,我乜都錯。外表正常工作中嘅我,動作係機械性咁做嘢,其實已經無咗決斷力,因為當時心跳、呼吸亂緊,個頭好痛、好暈,四周嘅聲音都好嘈,連空氣都係嘈音,無辦法集中精神,覺得每件事都控制唔到,好痛苦,然後我個靈魂就不斷去跳樓,一分鐘內,腦內重複咁衝去跳樓哩個動作,覺得死先係解決到嘅辦法。如果返去古代,我哩啲感覺應該被人認為我唔係鬼上身就係俾鬼迷,因為連控制自己嘅能力自己都感到失去咗,嗰種無力感、嗰種想解脫自己嘅感覺,真係好恐怖。

待續我會去講一下自己嘅解決方法。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192611
Date: 2019-04-15 15:30:51
Generated at: 2019-04-19 13:26:42
Permalink: https://www.vjmedia.com.hk/articles/2019/04/15/192611/我是一個抑鬱症患者-咩係panic-attack?