我就快排到公屋,可唔可以現金出糧唔用銀行過數?

 

延續返上兩個禮拜啲人唔多想加人工,今次再分享多一個故事。話說餐飲業好多時都會有啲計時薪嘅 Part Time 炒散,尤其是年尾、新年哩啲旺季時候,需求就更加大,因為哩啲時候都會比較多酒席、派對、節日慶祝活動等等。而好多公司為咗搶人,年尾嘅時候都會開始加時薪,希望籍此吸引多啲人黎幫手。

有一日,有個炒散打黎 HR,好激動咁講:「我之前耐唔耐都有黎你哋到返下工,但係我申請咗公屋好耐,哩兩個月好重要,上唔上到樓都係靠哩次!但係你哋又好衰唔衰依家先黎加人工,咁我咪好容易過入息上限,好危險!我最近都會繼續黎返工,你哋幫我諗個辦法,例如可唔可以 Hold 住啲糧,過埋哩兩個月先出返俾我?又或者哩兩個月唔好戶口過數,直接出現金俾我……」

小編一路聽,一路都覺得好笑。申請公屋係哩位阿叔嘅個人選擇,其他人無義務去幫你。公司加人工係腦細嘅決定,小編相信大部分其他炒散都會係開心多過唔開心。公司唔係得幾丁友,好多野都要跟足規矩去做,例如唔係「現金場」就唔係「現金場」,唔可以用現金出糧,你叫小編點樣去特別幫你一個?!

其實講到尾,件事好簡單,阿叔係炒散,返定唔返,個決定權喺佢到。如果佢覺得哩兩個月時薪高,對佢有影響,佢大可以選擇返少啲鐘數,或者唔返都仲得,又或者自己去低啲人工嘅地方返工。哩啲野人哋好難教你點做,自己諗下啦阿叔……

可能你會話小編明明都係想要多啲人手,盡量配合到條友對小編都有幫助啦。某程度上你都講得岩,之不過咁,有啲野企喺公司立場黎講,有啲原則係需要堅守返,唔係話一句唔夠人手,就可以打橫黎,放棄哂公司所有、一貫以來嘅原則同規矩。前線永遠都會覺得自己係一個 Profit Centre,公司需要靠佢哋搵錢,所以佢哋所有嘅要求都要滿足到。其實正正就係因為咁,先需要 HR 哩一類嘅後勤同事,幫公司去堅守住核心價值同埋規矩,最低限度唔可以俾哩一類嘅人反客為主,以為自己一丁友付出勞動力就大哂,漠視咗背後都辛辛苦苦默默耕耘嘅後勤同事。

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192632
Date: 2019-04-16 05:48:15
Generated at: 2019-04-19 11:51:17
Permalink: https://www.vjmedia.com.hk/articles/2019/04/16/192632/我就快排到公屋,可唔可以現金出糧唔用銀行過數