你有無試過買U記排隊排到好似排銀行咁?我試過。

 

相信一講起排銀行,大家都會勾起唔少煩燥又沮喪嘅回憶。一嚟大家多數都係放Lunch 時間塞晒去攪銀行野,二黎個個嘅Service 唔同,有啲一Serve 要半個鐘,下個到你都好,你都可以企到腳軟。但係你有無諗過,係大商場嘅連鎖時裝店,都會有以上嘅光景?我今日就排到嬲嬲地。

話說今日我就要打波,點知錯手拎咗兩件波衫,無拎波褲,咁帶晒野又約晒Friend ,無得打好慘架嘛,咁就諗住平平地買條頂住檔先,去到揀咗兩揀,就埋去櫃枱比錢。我見佢果度有四個Cashier 開緊工,前面得兩個人,我心諗好快就攪得掂啦。排下排下,過咗五分鐘,條隊都無郁過,個客照係度同個收銀哥哥講緊野,我諗住可能有啲衫要換,又或者有啲西客係度發癲。我心諗如果係真係有四個西客,咁當我唔好彩啦。

事實就係唔係呀嘛。

等咗兩三個字,終於到我比錢,個收銀姐姐都好有禮貌咁講咗句歡迎光臨,但之後聽到佢講果句我就燥啦。

「先生,想問你之前有無登記過做我地嘅會員呀,而家登記會員即時減十蚊喎。」

我諗咗一諗,佢就隊咗張Instruction 比我,張野上面有QR Code 同埋流程,大概就係Scan QR Code 上網,入電話之後收SMSVerification,可能仲要入下資料咁。跟住我終於望到隔離果三枱係度做緊啲咩,原來三枱都係度玩緊個登記。

你做會員登記嘅Promotion 唔係問題,你點都唔會係個Cashier 度做下話?一來你間野嘅顧客,由十幾歲到七十幾歲都有,每個人用部電話嘅能力都唔同,個啲收銀就好似區議員開手機班咁幫人登記,佢個登記Procedure 又唔係短喎,正常程序起馬每人都攪返三五分鐘,我Shopping 完,梗係想拿拿臨比完錢就走架啦,你點會係一個人購物過程入面最心急嘅一步走去阻住人架。二黎,我啱啱提到正常程序就三五分鐘,咁照道理我都唔洗排三個字,咁點解我要排呀?咪就係今日唔正常囉。頭先提到,佢個登記程序又要SMS Verification,我由1915 係U 記比錢,食完野,打埋文,準備換衫,到而家2005,我都未收到個驗證碼,即係點呀,即係等完十九幾分鐘,到頭來都係拎唔到果十蚊呀。

你要Recruit member 有好多方法嘅,你Set Counter 一路登記,一路派現金卷又得,派單張叫人Join 又得,你係要塞係個收銀度要人等,客又煩,收銀又做到隻狗咁,最後你又收唔到人,你話呢啲公司係咪個腦裝屎?

 

 

作者:麥精維他奶

麥精維他奶

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192641
Date: 2019-04-16 06:26:26
Generated at: 2019-06-24 20:50:50
Permalink: https://www.vjmedia.com.hk/articles/2019/04/16/192641/你有無試過買u記排隊排到好似排銀行咁?我試過。