【塔羅個案】男教友出軌斷正求妻子原諒,原因係「呢個係神比我地嘅考驗」

文教 / 最新文章綜覽

 

 

宗教本身無毒無害嘅,重點係信徒自己點樣去理解教義。利申,我唔係想喺度抨擊任何宗教呀(係,我係戴頭盔)不過,呢個世界,咩人都有,相信大家都會認同呢一點。

我身邊有啲耶教徒,好努力地做好自己;我亦見過有啲耶教徒,人地做錯野就唔得,自己做錯野但係人地唔原諒佢呢,就話人地唔「寬恕」唔「大愛」。

就好似今次呢個例子咁。

搵我嘅客人,係位年輕太太,叫佢做 April 吧。April 做會計,人工不錯,可以同老公合力支持頭家,有時柴米油鹽自己比多少少錢,都覺得「兩公婆無所謂啦」,唔通真係拎個計數機出黎同老公個個月尾計家用分配咩。

April 先生係基督徒,亦好熱心參與教會工作,至於佢正職係乜,我無問,反正與今次嘅故事無關。

因為,故事,主要都係關教會事。

佢先生熱心教會事務,熱心交朋友,熱心照顧教會 Newcomer。當中,不少為女性,April 雖然唔係咁鍾意,但係,佢同自己講,老公對宗教有熱誠係佢自由、係佢優點,自己咁多心,未免太小器。

直至有一日 April 發現老公唔知幾時將電話同埋電腦嘅 Login Password 改左。

April 起疑心,直至後來又再發現老公,身上有唔屬於自己嘅香水味。

後來,April 終於搵到更多蛛絲馬跡,於是黎我度開牌一問,赫然發現丈夫不忠。April 心中有數,開牌得到肯定之後,終於鼓起勇氣同先生攤牌。

點知。

「成日對人存有懷疑,咁樣係唔啱架,老婆。」先生仲想扮無事發生,直至 April 拎出電話中嘅證據,係一堆情慾短訊 Cap 圖。

「呀……即係咁,我認我鍾意人地。」先生一秒轉口風,「之但係,我相信呢個係神比我地嘅考驗,我知錯架啦。我地神交架咋,我無搞過人地架。」

April 聽到雙眼瞪大,「神嘅考驗?!佢同我講神嘅考驗呀,佢自己係教徒咋,我唔係架!關我屁事呀!佢出軌仲嫌我小器唔原諒佢?如果唔係我有證據喺手,佢仲想扮無事發生呃我落去呀!」

其實,類似嘅故事我聽過唔止一次,不過聽到一個教徒夠膽死大大聲將自己出軌講成係「神嘅考驗」,我真係好失禮地大聲笑左出聲,笑到 April 都笑埋一份。

「咁佢有無話個女仔係惡魔嘅誘惑呀?」我笑住繼續調侃,「神叫你遇見試探架吖嘛!」

「神婆你點知架!佢真係咁講!」April 驚叫一聲,「佢仲話我點解要步步進擊、點解唔放過佢、得理不饒人!」

我久違地反了個白眼。

偷食出軌,比人發現,實會話知錯架?實會話對另一半唔住架?之但係,件事如果唔比人發現,佢又會唔會覺得自己有錯先?定還是會覺得隔離飯香吖?

唉,呢個世界,真香,呢類故事我聽唔少,而我都只會講一句,無論你係比老婆出軌嘅老公、抑或比老公出軌嘅老婆,一段婚姻,你如果根本無法對對方再次建立信任嘅話,扮大愛包容無用架,做比人睇無用架;要勉強逼自己行落去,先係對自己最大嘅殘忍。

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192668
Date: 2019-04-16 23:45:10
Generated at: 2019-07-17 05:30:01
Permalink: https://www.vjmedia.com.hk/articles/2019/04/16/192668/【塔羅個案】男教友出軌斷正求妻子原諒,原因係