曾經,我夾左喺婚外情夫婦嘅中間. . .

 

 

幾年前,一個好友嘅老公透過FB message搵上我,話佢老婆今日放假,叫我搵佢老婆傾下,話佢老婆好需要我去同佢傾計咁話。佢搵得我當然知道係佢老婆嘅朋友當中,我會係最清楚佢老婆嘅一個。就係我好清楚佢,咁突然搵佢老婆傾,我唔會問到啲咩,同時我都知點樣可以令那個好友出嚟見我。所以一面約個好友出嚟,另一方面就係道迫問佢老公究竟咩事,連環迫問下知道佢從電話中搵到老婆同一個男同事嘅床照,我當下嘅反應係「好玩唔玩,玩床照咁on9呀!」

因為佢地都係賣電子產品公司做,所以好熟悉電話運作,好友已經delete晒啲WhatsApp,但佢老公真係好熟悉電話嘅運作,所以都可以搵得返出嚟。仲靜靜將佢老婆電話定位,知佢平時去開邊間酒店。我就回想,條八婆早前久唔久就留言俾我,話約咗朋友出去,唔想佢老公煩所以話約咗我。我哩啲義氣仔女,唔會多問,當日嘅FB都唔會出POST,費事佢老公睇得出我無同佢老婆一齊。原來我一直被利用,佢每次提出哩個要求都係去同條佬開房…………又再深問,原來那個男同事嘅女友都係同一間公司做,四人做同一間公司,乜搞啲咁高難度嘅嘢呀,係道食唔好係道痾呀少奶…………話說哩個好友白淨高挑都算靚,生咗都仲有少女味,有人追真係唔奇,佢老公無樣但勝在有品有內涵,記得佢老公其中一句:「佢搵個靚仔我都明點解丫,但對方仲樣衰過我嘅。」嗰刻深深知道偷食唔一定食好西…………

當日佢老公好焦躁,狂打電話俾我,傾幾句收咗線,隔無耐又打嚟,搞到我都開始亂。然後我忍唔住,要佢俾我冷靜下,想一下見面應該要點同佢老婆講,唔係無識過朋友收帽或派帽呀,係未試過有人咁求救,仲要件事係自己由細識大嘅好友呀!晚上見到朋友,我單刀直入咁話佢知我知道咩事,要佢將事情始末講出嚟,了解咗佢嘅心理,之後當然訓話一番,因為佢老公真係人品好又純情,世間真係難搵,哩點佢自己都知。而且最重點係,點都好唔好影床照,就算自己老公都咁話,科技嘅嘢點信得過?而且仲要同奸夫影,人心嘅嘢做得奸夫點都要留返條線保護自己丫!

之後嘅日子,佢老公訊息及電話嘅安慰都唔夠,要我出嚟見面傾。預感佢會情緒失控,所以約佢係海邊,如果係餐廳,佢爆喊俾人見到我點解釋呀?果然,佢真係爆喊………………佢嗰種傷心,佢嘅心理狀況,見到相中自己老婆同第二個男人甜蜜同床,哩個陰影好肯定佢一世都記住。當知道佢已經由心理影響生理,瞓唔好、食唔好,經常焦躁,我電話就經常出現佢嘅記錄。如果你知道佢朋友唔多,而且第一次係俾哩個老婆,你都會忍唔住由佢瘋狂發出焦躁訊息,俾多啲關心佢。就算嗰個係我由細識到大嘅好友,你見到一個男人被傷到不能好好過活,所以真係痛心咁勸佢老公帶住個小朋友離婚,有睇我以往《我是一個抑鬱症患者》系列嘅都知因為家庭背景,好深明顧住心靈比一個所謂完整嘅家重要。然後又搵咗啲相關機構「家庭綜合服務中心」,始終處理哩啲問題,一個有專業架構嘅社工會比我連婚都未結果嘅人知道點處理。

其實,我有同佢老公講過,如果你地最後係選擇返一齊,你地會好自然將所有罪名推俾我,然後重新再嚟過。我哩個預言真係成真,女嘅block9我,男嘅delete我。我唔知佢老公選擇唔分開嘅理由,可能係佢曾講過無可能會再搵到咁靚嘅老婆,定係想俾個小朋友有個完整嘅家,any肥有係其他途徑見到佢地一家去影樓影了一些愉快嘅家庭照,但無論佢地笑到幾開心,都好肯定那位老公永遠心中有條刺。今日,佢地見到哩單「安心」洗板,我只祈求朋友嘅老公唔好崩潰,如果你曾經同佢相處及傾談,你就知佢有幾脆弱。每每見到類似嘅新聞,都會想去慰問一下這個朋友嘅老公,但我知道佢會ignore我。但我真係好想講:「你點呀?有無多飲水?訓得好唔好?哩幾年你過成點?」

我本人道德包袱超重,極唔支持偷食哩個行為,甚至覺得要保留浸豬籠哩個刑罰。但係五光十色嘅慾望之都,好多面對慾望都獸性大發,一堆堆借口俾自己出軌。希望睇到哩篇文章嘅人,如果你已經派帽嘅,保護自己,都顧及下另一半心靈,玩還玩,要非常低調,非常小心,係一個無第三者嘅情況下你地先親蜜丫唔該。哩種心靈受傷,慘過俾刀插入心㗎!

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192686
Date: 2019-04-17 05:36:40
Generated at: 2022-09-30 13:54:17
Permalink: https://www.vjmedia.com.hk/articles/2019/04/17/192686/曾經,我夾左喺婚外情夫婦嘅中間