我是一個抑鬱症患者——我如何解決panic attack

文教 / 最新文章綜覽

 

今日會講我如何解決panic attack ,都可以講係一篇感謝文嘅。其實當受到panic attack 影響嘅時候就是死神敲門嘅時候,嗰種痛苦你試過都唔想再試,又唔知幾時佢會嚟搵你。就係已經有陰影,仲要面對嘅時候就會抓狂,好似唔識游泳嘅人跌咗落海亂咁掙扎,見嘢就想抓住為求活過嚟。我嘅抓狂方法就係向有機會同我傾計嘅朋友試下續個搵,有時都等唔到訊息要直接打俾對方,要求即時通話。係公司就無辦法,不過係公司就算panic attack 都唔會發生咩事嘅,因為係痛苦到想跳樓都去唔到,只有好痛苦咁繼續手部工作,所以解決方法都要捱到放工先可以實行。

可是我係一個會為人想嘅人,會想「依家晚飯時間,會阻到人喎」、「佢近期工作好似好忙喎」,所以多時發覺可以搵嘅對象唔多…………好耐以前係我病情最嚴重嘅時候,就係男閨蜜陪我渡過,日日放工回家就望實部電腦等佢msn上線,然後震爆佢,隨住時代變遷科技進步由msn 講到WhatsApp ,真係好感謝都好佩服佢可以包容到我海量嘅負能量。唔好以為我地係友達以上戀人未滿嘅關係,佢已經結咗婚啦,係佢有女朋友(現任老婆)嘅時候,我都開始努力習慣無咗佢陪我成日傾計嘅生活。我嘅人生無乜親人,可以算係親人得返我老豆,能夠撐到今日都係靠朋友。所以一直以嚟,發覺對方值得成為朋友,我都會努力去付出真心,「好友就係自選親人」所以對待我嘅好友就好似對親人咁,會感恩、唔計較得失,佢地感受到嘅又願意同我互動嘅,無論發生咩事都會好好維繫,而且保護我重視嘅朋友。所以少咗個男閨蜜可以搵,仲有幾個好友可以俾我求救。

「我需要傾計」、「近來我唔係好掂」,當我對朋友咁講佢地就知咩事,有啲甚至會即時約我出嚟。記得有個好友見到我求救訊息,佢就約我第二日去佢屋企,仲買定我鍾意嘅雪糕等我。當晚我講我嘅情況,遇到咩事嘅時候,佢之後喊晒,因為佢覺得如果我一直咁落去,我個人生就係咁苦落去,而且人生嘅嘢話完就完隨時係突然一個意外就完結。其實佢有啲說話係令我痛苦,可以講係「殺人的正能量」,佢要我面對一啲事,將事情推到最壞打算,會發現沒什麼大不了,仲有一句「你自己都唔努力就無人可以幫到你」。嗱,佢係啱嘅但放係抑鬱症嘅我就唔係好work ,道理還道理,但心理上我能承受嘅已經超過我負荷,咁你嘅道理放係我身上咪即係加多幾舊大石加重我負擔,迫我去死。但is fine ,我唔會去責備佢,都理解佢,佢個心係想我好,佢係真心對我,佢付出真心地關心唔係hea我。佢生命時間願意放係我身上喎,我仲想點呀?佢唔明嘅嘢咪有機會慢慢俾佢明白囉~更何況佢本來無責任去明白嘅,但我每次有事搵佢都願同我傾訴喎。感恩先係我真正需要做嘅嘢啦,仲走去鬧佢講正能量迫死我,除非想迫走一個關心自己嘅人啦,咁我就鬧爆佢啦~對我嚟講,有人關心自己就係捱過panic attack 嘅動力啦,無咗關心真係生存唔到。

不過,世界唔係圍住你轉嘅,有時黑起上嚟,你有你panic attack ,佢地有佢地生活忙碌,唔通我病發就大晒咩~哩個時候最好方法係困自己係屋企,同那種感覺共處,會久唔久望住個窗然後想「我住咁高,一跳就得」,不斷咁掙扎,哩啲我無去同朋友講,我怕講咗佢地會驚,會變得小心處理我,我唔想自私。係at17嘅Ellen 墮樓新聞瘋狂洗板嘅時候,我就想「幾時會到我?」。然後我明白到一個為人著想或要面子嘅情緒病患者係比較高危,唔想打搞人所以自己一個鬱悶住去同死神博鬥,輸咗人生就咁玩完。但我嘅好友呀,請求你見到唔好驚訝,都唔好怕咗我而疏離我。我會懂得恐懼嘅時候求救,更會知道你地有時間就會去關心我,我知道你地係會關心我就好夠,相信我會撐到,要知道我是好努力的。男閨蜜講過「你都唔係堅強,扮咩堅強啫」,然後我答「除咗堅強,我仲可以做咩?」我都係努力想活著,而且我都知道目前生命意義係咩,打得哩個系列,就知道我好清楚自己活著目的啦~

 

P.S:其實想了解多啲情緒病及情緒困擾,依家有好多機構嘅網絡都會有講解,而且說書人哩個POST 仲教你點關心情緒困擾人士。

P.P.S:情緒病患者呀,希望我嘅自白都能夠俾到你地知世上有人同你一樣,用好多方法面對。如果身邊搵唔到人傾訴,試下上網搵,有好多PAGE 、有好多機構都願意成為你嘅聆聽者,都有不少GROUP 係可以俾你地互相安慰,有啲嘢跟同路人講,始終容易被明白的。只要能夠捱過最差嘅時候,之後你係會擁有更多更好的,你地值得擁有更好的,唔好輕易放棄。

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192793
Date: 2019-04-19 05:48:43
Generated at: 2022-09-28 14:41:13
Permalink: https://www.vjmedia.com.hk/articles/2019/04/19/192793/我是一個抑鬱症患者-我如何解決panic-attack