我是一個抑鬱症患者——病友唔應該令自己變成「情緒撚」

文教 / 最新文章綜覽

 

好似無講過我點解要寫哩個系列,話俾你地知,這些個人故事從來無同人講過,以前嘅男友、最好嘅朋友,佢地都唔知。佢地只係知道我中一就無咗阿媽,畢業我自己一個養阿爸撐起頭家,只係咁多都夠佢地覺得係一個苦命嘅女人仔,唔難估計如果我講埋我嗰啲辛酸嘅童年及我自己感覺,佢地一定會可憐我。唔想佢地因為覺得我可憐而對我好,所以好努力咁做自己想成為嘅人,要求自己成為一個好人,用真心去對待人,令佢地覺得我好而同我親近。我曾講過「心存善念,定能偶遇天使」,想自己遇到天使,自己思想必須接近天使,就係咁一路以嚟,我嘅路一直遇上不同嘅天使扶助我走到現在,亦都可以講無咗佢地我早就死咗。

「善欲人見 不是真善 惡恐人知 便是大悪」- 朱子治家格言。坊間太多掛住善良旗幟嘅組織或人,其實都唔係話好介意佢地借善良名義去滿足自己欲望嘅,只要最好出到嚟個效果係幫到人嘅話…………ok,咁我覺得坊間好多唔係話真心幫人,甚至訊息以偏概全教壞人,唔通我走去代人阿媽教女咩,我人生意義唔係咁㗎嘛,時間都唔係咁浪費啦!咁就憑自己能力做過到自己良心嘅事。

啲人成日話同理心,對情緒病患者/困擾者要有同理心,咁主動關心你嘅人呢?你嘅身邊人呢?做人公平啲,對返佢地要有同理心,唔可以話佢地唔識對你同理心你就發晒癲咁鬧人㗎,我其他文章都講過好多次㗎啦,每人背景、成長環境、心智唔同,有啲嘢人地係代入唔到都無計,等如有幾多男人理解到m痛及生仔嘅痛?佢地有努力去理解就已經有心,無心之失嘅正能量衝擊,又點解要講到對方殺人兇手咁?好心做壞事都不值被原諒?以我這個到今日仲同個病久唔久玩遊戲嘅人嚟講,作為一個情緒病患者,你想有救、有人陪、有人幫,真係要好好學做人,凡事做到極致就變「撚」,「環保撚」、「走塑撚」、「耶撚」就係咁嚟,想唔想成為「情緒撚」就真係自己揀,仆街唔好鬧人啦~

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192816
Date: 2019-04-21 05:38:59
Generated at: 2022-09-29 22:05:56
Permalink: https://www.vjmedia.com.hk/articles/2019/04/21/192816/我是一個抑鬱症患者-病友唔應該令自己變成「