呢度興準時收工,做唔晒你帶返屋企做囉

 

 

「夠鐘喇喎,你仲唔走?」同事Samantha說。
「仲爭少少,等緊agency比嘢我,今日要出。」我說。
「快啲走啦你,呢度無人OT㗎,你拎返去做啦,個個都係咁。」Samantha說。
「但係啲file喺晒電腦喎。」我說。
「你可以拎個hardisk返嚟抄啲files返去,總之快啲走啦,唔好留喺度。」Samantha說。

大家都知我轉咗新工,所謂嘅新工蜜月期一秒都無出現過,每日都要開無數嘅會,對內對外都有,基本上係得一半時間可以坐定定做嘢,而呢一半時間又再分咗一半比腦細捉住我講嘢,所以唔好話做嘢,我連email都check唔晒,然後腦細就一語中的咁話:「用手機check email啦,好方便。」即係暗示朝早、去緊開會同放工都睇到,真係令我有少少標冷汗,之但係我接受得呢個offer其實都預咗係chur,所以就打算OT追下進度,點知比幾個同事叫我快啲走唔好留喺公司。

我同朋友講,佢哋話可能同事係唔想我咁辛苦要OT,我話唔係喎,佢哋係叫我返屋企做,唔代表唔使做,其實我都明嘅,新入職係唔應該做壞規矩,搞到有OT嘅風氣,但問題係呢個係假準時收工,返去仲有排做,其實我會寧願喺公司做多陣就算,同埋其實腦細係夜收㗎喎,都唔知係咪跣我嘅大佬。

Anyway,之後我都跟大隊早少少走,仲要無帶嘢返去做,因為office hour我堅係已經chur到盡做嘢,如果我再帶返屋企做,我諗我好快就會頂唔順辭職(雖則都已經睇緊啲工)。而家每日放工個人都散哂,咩都唔想做,放假都淨係想留喺屋企休息,心情勁差,個人又負面。其實未過試用期,僱員雙方都有權講bye bye,所以我成日都提自己,返工啫,唔使賣命嘅,大不了都係佢炒我/我唔做,唔想自己太大壓力又胃痛。

雖然有提自己放鬆啲,但係「轉唔轉工好」呢條問題仍然成日浮現喺我個腦度,其實都好影響心情,係人都想搵一份人工高、福利好、準時收工、學到嘢,腦細同事又好嘅荀工,但係要搵到真係難過中六合彩,於是就要開始諗以上邊樣嘢對自己係最重要,要有所取捨,可惜就算你諗清楚自己想要咩,都要睇緣份,好彩遇到份合眼緣嘅工,都要睇下人哋請唔請你,就算請咗你都唔好開心住,仲要睇下做唔做得嚟。

搵工就好似搵Mr. right咁,初初睇佢外表型英帥靚正,住洋樓養番狗,嗒晒糖,點知一齊咗先發現原來佢係變態鍾意玩SM,咁就奶嘢又要由頭再搵過,唯一唔同嘅係Mr.right你可以唔搵,但係工就無得唔搵,唔做嘢邊有錢,鬼叫你窮呀頂硬上!

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 192949
Date: 2019-04-22 05:58:23
Generated at: 2020-02-19 22:37:17
Permalink: https://www.vjmedia.com.hk/articles/2019/04/22/192949/呢度興準時收工,做唔晒你帶返屋企做囉