一個去咗台灣返嚟香港嘅90後小小嘅心聲

作為一個接近00後嘅90後，因為屋企比較窮嘅關係，所以一直覺得讀書出嚟就係為咗搵分好工，但係越係緊張成績，我考得越差，越讀越hea，最後索性半工半讀完成個高中。我嘅dse成績只有3科系3，個時好迷惘，唔知點算個時，去咗台灣。

我個人，真係好討厭香港嘅教育模式，我知道，好多人覺得我係香港，係一個loser，大家都會覺得我係因為唔夠好，唔夠競爭力先會覺得香港嘅教育模式好討厭，我承認我唔夠唔夠競爭力，但係唔代表我係一個loser。

係台灣學習，我係好有壓力，我討厭自己覺得自己好蠢好無用，將無進步嘅事，怪罪於自己唔夠努力，所以我逼自己只要我讀唔晒d嘢，我就唔訓得，我都逼自己放學放假除咗食飯沖涼等等就溫書，但係每次都讀唔晒個時，我就會好憎自己，覺得自己好無用，成日喊，驚阿媽擔心，就自己困係宿舍，好多次都想跳落去，一了百了，我唸一定有人明白，每一次要將好想自殺嘅自己拉返嚟嘅個種痛苦，每次自己冷靜個時，又會為自己可能真係會因為咁去咗而覺得好恐怖。

但係我係台灣重拾對學習嘅興趣，並唔係因為台灣嘅學生比我差，佢地嘅程度同我差唔多，好多仲勁過我，我係班嘅成績，日讀夜讀，好努力咁讀都只係中間，但係係台灣，我開始中意學習。每一次就算我哋做得唔夠好，做得唔夠完美，老師佢地都會睇到我地其他嘅優點，有d老師會覺得我哋努力嘅過程好重要，佢地唔介意結果唔好，有d老師會鼓勵學生再接再厲，有d老師會直接比意見，但係無一個老師會因為學生盡力成績唔好而鬧佢地唔夠努力，佢地會覺得係自己教得唔夠好，每次都改善自己教育方式令到學生更加容易吸收。

我係台灣都學到好多關於待人處事嘅態度，就好似唔好勉強自己去迎合人，就好似面對挑戰都唔好驚等等。

係台灣，學生好包容彼此，就好似我咁，雖然比較靜d，比較少嘢講，亦都好少同佢地出街，但係，佢地依然好包容我，我都係台灣開始做自己，想拒絕時就拒絕，覺得可以時就讚美，佢地會覺得咁樣其實好正常，但係我係個邊，同香港人一齊住我反而比人排擠，我明明無做任何野，我就比人攻擊到連其他人都知道。我係香港亦都因為唔太同人一齊去廁所，一齊放學，一齊等人，一齊去做某某事比人排擠，後來我係台灣學到，就算d人因為咁唔中意你，又如何?佢地對你嚟講一d唔重要，重要嘅就唔會咁講你啦，何必因為咁改變自己呢?後來這句so what ?I don’t care！就經常出現係我心裏面。

我寫呢篇唔係想要造成港台糾紛，希望睇完嘅人唔好刻意挑起紛爭，歡迎大家多多留言。
最後，我依然期待自己可以由一個無用嘅人變成一個自己會中意嘅人。

作者：可可粉

第一，因為覺得可可粉係一種令人開心嘅嘢飲，希望自己都可以令自己舒服同開心。第二，可可粉可以做成好多食品，希望自己可以一樣多樣化，所以結合呢兩個願望嘅心意，起名可可粉。

閱讀後覺得好，請多多讚好及分享～：）