「名過其實」、「實過其名」與「名實相符」

 

做人做事通常都可以分為五種狀態:「有名無實」、「名過其實」、「名實相符」、「實過其名」同埋「有實無名」

名同實就好似陰同陽咁,乜鳩都可以套用落去咁滯,有所對比就得。

例如用嚟睇人嘅話,名可以代表「言」又可以代表「志向」,實可以代表「行」又可以代表「能力」;用喺職場到,名可以代表「職位」,而實就可以代表「能力」、「權力」同「成績」。

名實有趣嘅地方係「此一時解名,彼時可以為實」,視乎對象同你嘅目的,同一樣嘢可以為名亦可以為實。

而至於以上五種狀態,我想講下中間三種。

 

世人皆以「名過其實」為惡,因為大家覺得佢哋係吹水怪。但事實上「名過其實」係令人趨之若鶩嘅,因為利益本身就係名嘅一種,明明自己唔相稱,但係就得到超乎其實嘅利益,邊個唔想要?一個草根市民中咗六合彩,就係典型嘅「名過其實」,擁有嘅財富遠大於自己嘅理財理力同本事。

講到尾,其實大家唔鍾意「名過其實」嘅人只係因為嗰個唔係自己,心生妒忌矣。仲有另一種唔鍾意「名過其實」嘅情況就係被人呃,例如「名過其實」嘅政客就係政綱與政績不相稱。

但係「名過其實」係咪真係冇得救呢?我就認為若果好好利用「名過其實」嘅狀態就有機會「名實相符」,甚或「實過其名」。一個人中咗六合彩,若果知道自己嘅不足,好好改進,其實佢有比普通人更多嘅資源上流。一個人得到一個虛職,都有名義去爭取實權。識得以名為台階去爭取實,先係「名實之道」嘅妙用。

 

「實過其名」聽落唔好,但係其實就好似春天泥土下嘅種子,慢慢發芽,生機勃勃,正係可以向上成長嘅狀態。一個人喺職場「實過其名」,即係有能力上位;喺學問上「實過其名」,即係仲有貨慢慢派。曹操、司馬懿都係「實過其名」。識得以實為階梯,名就自然更上一層樓。「實過其名」嘅人亦都係最可怕,因為其名不顯,你好難知道佢「實過其名」,星火睇落不成威脅,但係可以燎原。而「名過其實」嘅人其實只係虛火,反而不足為懼。當然,呢個只係指對方係敵人嘅情況下,自己友嘅話就另當別論。

 

「名實相符」睇落最好,最符合中庸之道,而事實上亦係最庸庸碌碌嘅狀態。你諗下,一個人如果升到一個「名實相符」嘅位置,能力同職位完全匹配,佢仲有冇料升上去?就算升上去都係「名過其實」,已顯疲態。同時,一個人如果「名實相符」,咁即係話喺佢呢個level入面,啲咁嘅人大把,並無出彩之處,唔係平庸,咁係乜嘢?我哋唔講能力,講心性志向同埋境遇現狀,「名實相符」正係安於現狀,又點會爭取向上呢?好彩嘅話庸碌一世,唔好彩嘅話,失去警覺,毫無遠慮,就會「名過其實」,危矣。

最後,我想講人貴自知,呢個自知唔係講緊大家一定要「名實相符」又或者「實過其名」,而係要知道自己處於咩狀態,咁先可以「名實互用」。否則,就好似某啲人成日埋怨冇職升,冇人工加,其實「名過其實」而不自知,想要嘅嘢遠大於自己嘅能力或者付出。

 

作者:山城小豬伯

總編話佢:「真人係幾靚仔嘅」

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193096
Date: 2019-04-25 20:38:09
Generated at: 2020-02-29 11:17:37
Permalink: https://www.vjmedia.com.hk/articles/2019/04/25/193096/「名過其實」、「實過其名」與「名實相符」