【嗚巴軼事】車門唔係個個識開. . .

 

由於大台除咗抽佣之外,基本上所有嘢都係撓埋雙手,當中當然包括教育乘客乘車禮儀啦。所以黎緊嘅文章我都會重點講吓一啲搭車要注意嘅嘢。今次就由開關車門講起。

開關車門係客同司機接觸嘅第一環,亦係最基本嘅一環。好不幸,好多人係唔識開車門。「吓?開門之嘛!咩唔識喎⋯⋯」咁你就大錯特錯喇。好多人開車門同開普通門一樣,一嘢就開盡哂度門,不論上車落車都係。啲客一去到車門,不論身型大細,有理冇理開盡度門,盡顯「有風駛盡𢃇」嘅香港特式。而開完門上咗車又唔係即時閂返度門,如果開門個邊係行人路都還好,如果係車路個邊,咁樣打開度門,其實係將度門曝露係被撞嘅危險當中。所以,上車嘅時候,車門其實唔洗開哂,夠入就得㗎喇,一般體型嘅人黎講呢,開一半其實夠入㗎喇⋯⋯

至於落車開門呢,我遇過咁嘅經歷:又返返去初初入行個陣,有一晚車個女仔(十幾歲嘅妹妹)由西貢去藍田地鐵站。去到落車點,個妹妹係右邊(馬路)落車,我都未出聲提佢睇後面,佢已經急不及待要開車門,剛剛拉開度門個吓,一架七人車係我架車身邊經過,我度門差啲報銷⋯⋯各位讀者,如果要開門落車,記得自望望後面有冇人/車經過先,然後再打開少少門,俾人見到你開門都會減速或者避開少少黎行,然後係門罅睇多次冇車冇人喇,先再開大啲度門落車。唔好以為係乘客,開門撞到人/車唔洗負責呀,起碼要負返一半責任㗎,而你坐個架車嘅司機亦因為你一時之快,爛咗度門,又要整(換)門,又要惹官非⋯⋯

講到閂車門,有啲客真係各走極端,有啲一係就閂唔實,有啲就「一嘢轟落去」,前者問題不大,稍稍用力就可以喇,後者真係問題所在。通常呢啲係咩客身上發生呢?開門開到好盡個班,由於度門開得太盡,變相成度門嘅移動距離大咗,加上個人坐咗係個位度又要彎前個人拉門柄閂門,於是一拉就成度門「嘭」埋。當然,好多人會話「架車咁硬淨,點會咁易嘭得爛呀?」但係,架車嘅門唔係木門鐵閘咁純粹一塊木板或者鋁板,裡面其實仲包含車窗摩打呢啲設備,嘢嘢咁大力嘭落去,會撞壞個摩打。就等於一嘢撞你個頭埋牆,你都分分鐘冇命啦⋯⋯只要門唔好開太大,咁度門由開到閂個距離就會細咗,相對閂門速度唔係有太多上升嘅空間。而且,閂門唔洗咁大力嘅,聽到細細聲「啪」一聲就代表閂實㗎喇。再唔係而家科技發達,度門閂唔實,儀錶板會有提示功能,司機見到就會提你再閂過度門嘅。

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193173
Date: 2019-04-28 02:28:48
Generated at: 2021-12-09 06:22:31
Permalink: https://www.vjmedia.com.hk/articles/2019/04/28/193173/【嗚巴軼事】車門唔係個個識開