【嗚巴軼事】無論你坐前座定後座,都要戴安全帶. . .

 

 

上次講完開閂車門要注意嘅事項,今日我又分享吓另一樣好基本,但係仲有人唔知,提佢佢都仲走黎問嘅問題⋯⋯

「乜後座要戴安全帶嘅咩?」

根據《交通安全(安全裝備)規例》(香港法例374章,附屬法例F),「在後排座位乘客沒有穩妥繫上安全帶的情況下駕駛私家車」係犯法嘅,而係《定額罰款(刑事訴訟)條例》(香港法例240章)犯咗上面條例(指俾警察捉到檢控)的話,係要罰款230大元。

雖然,後座乘客配戴安全帶嘅法例係2004年開始實施,而且政府亦有宣傳有關法例,不過直至2019年嘅今日(整整15年),都依然有客唔知道後座要戴安全帶,如果你係遊客唔知都情有可原,但係香港人唔知道,就真係令人反哂白眼。

我都試過好幾次,有客上車之後唔扣安全帶,我都會提醒佢哋要扣返好。不過,有啲客就好鐘意挑戰吓你,問你「乜後座要戴安全帶嘅咩?」咁我唯有答佢「犯法㗎喎⋯⋯要罰錢㗎⋯⋯」正常小小都即刻扣返,遇到有啲想同你拗落去「乜係嘅咩?」我即時回佢「條例都行咗超過10年㗎喇,運輸署個網有寫」啲人先死死地氣扣返。

與其話係乘車禮儀,其實更多係自己安全。老老竇竇,「馬路如虎口」,而且馬路上面好多嘢係千變萬化,就算揸住個呔盤都控制唔到咁多。如果遇到急煞,你又唔扣好安全帶,後座都真係可以變「炮彈飛人」。

不過,最緊要嘅係:「收你個幾十蚊,因為你唔扣帶罰我230,即係程車要倒蝕?同我落車啦你!」

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193284
Date: 2019-04-30 05:00:06
Generated at: 2021-12-09 06:11:33
Permalink: https://www.vjmedia.com.hk/articles/2019/04/30/193284/【嗚巴軼事】無論你坐前座定後座,都要戴安全帶