【嗚巴軼事】推廣電動車?口講口賠就有,政策落實呢?

 

電動車係香港可以過愈來愈普及,政府亦推出稅務優惠吸引人由汽油車換做電動車。甚至連電力公司(呢度指中電)都好樂意幫啲屋苑同停車場加裝充電設施。不過,由電動車引入到而家,充電設施都唔係好足夠。至於原因係咩?有時唔係常理可以理解到。

今晚,我係黃大仙車個客入深井。翠絲小姐同佢老公食完晚飯返屋企。當時講起做大台咩車比較好,我當然覺得混能車好啦,油錢平呀嘛,但利申我係用緊汽油車,我貪車價平呀嘛⋯⋯

原來翠絲先生係用緊Tesla,仲係SUV款,不過充滿電都係行300公里左右,所以搵地方充電都係問題。雖然最近可以去龍蝦灣附近公眾停車場免費充電,但係充電位好有限,就算停車費好平(公家車場可能講緊十蚊八蚊泊一粒鐘),如果前面幾架車排緊,講緊等都等幾粒鐘。

翠絲先生接著就話,其實佢住緊個度都有廿卅個車主都係揸電動車,個屋苑其實真係有需求去安裝充電裝置。佢哋主動搵過電力公司做技術評估同游說,又搵過民政事務處、區議員幫手爭取,連管理公司都同意咁樣做,亦都安排得到位置安裝,但係偏偏就係成唔到事。咁我就問「咁業主立案法團呢?」原來,成件事個癥結所在,就係係法團主席度。由於主席本人唔係電動車車主,佢係揸汽油車嘅。就算電動車車主們願意繳交額外費用,撥歸屋苑嘅「維修基金」,阿主席都不為所動。或者將部份轉做電動車位,會令汽油車可用車位減少之故啩⋯⋯

最後臨落車,我都祝翠絲先生成功爭取充電位啦!排隊等充電都幾花時間。至於我呢,只係希望油價早日回落啦,始終我都係揸車搵食,唔係炒期油呀嘛⋯⋯

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193317
Date: 2019-05-01 05:19:53
Generated at: 2021-12-09 06:49:15
Permalink: https://www.vjmedia.com.hk/articles/2019/05/01/193317/【嗚巴軼事】推廣電動車?口講口賠就有,政策落