點解冇人用自己對男朋友幾好嚟曬命?

 

「噚晚啊,我男朋友買咗個最新限量版手袋比我,都叫佢唔好咁破費啦。」
「早兩日我男朋友訂咗間餐廳同我慶祝週年紀念,佢居然專登自己請個人嚟拉小提琴,真係好浪漫囉。」
「講開又講吖,我男朋友⋯⋯」

唔知點解,當有一班女人圍埋一齊,曬命就好似係一個基本動作:男朋友愈破費,做嘅事愈骨痺,身為女朋友嘅佢地就愈有曬命嘅價值。男朋友對自己好固然高興,但香港有一個好扭曲嘅價值觀:男朋友對女朋友好係一定要,但女朋友對男朋友好呢?係恩賜。當好多女仔千方百計諗緊點樣「令到」男朋友可以做啲比自己足以喺姐妹們面前曬命嘅行為嗰陣,佢地又有冇諗過好好咁對自己男朋友呢?

身為一個好男友,唔單止要風趣幽默、唔可以樣衰、入得廚房做得家務、工作穩定又有上進心之餘仲有好多時間陪自己、最好係多高尚興趣、唔宅再加上能文能武,當然唔可以酗酒但又要飲得啦⋯⋯真係聽到都覺得辛苦。但點為之一個好女朋友呢?我諗只要你唔似黃心穎有仔就溝、容許男朋友有打機嘅時間、有煮過公仔麵比男朋友食,基本上你已經係個好女仔。

公平咩?(當然啦,部份係男人自己攞嚟。)

個個女朋友都要求男朋友對自己好,要浪漫要肯洗錢,啲要求一山還有一山高;但佢地又有冇諗過自己都會按照返對男朋友嘅標準去盡一個做女朋友嘅責任呢?男朋友願意為自己落廚,願意為一餐浪漫晚餐大花心機,但又有幾多個女朋友會願意去為男朋友廚房煮返幾味?明明週年紀念係兩個人都有份,又有幾多個女朋友試過喺依日為男朋友計劃返行程?二月十四同三月十四依兩日係咪有試過其中一日送返嘢比男朋友呢?

喺香港做女仔真係好舒服,拍拖差唔多所有時間都係等嘆等享受等收禮物。

正當一班女仔好興奮咁去講男朋友有幾錫佢,突然有一個講咗句「我男朋友真係好好架,所以我見佢個銀包舊咪買個比佢」之後,全檯靜哂。

係啊,會對男朋友咁好嘅女朋友,係連女人都會嚇親。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193380
Date: 2019-05-03 04:25:41
Generated at: 2019-06-26 21:21:44
Permalink: https://www.vjmedia.com.hk/articles/2019/05/03/193380/點解冇人用自己對男朋友幾好嚟曬命?