2020年代的人生角色

 

 

早前有講過現代人(更精準應該係香港人)係唔需要拍拖,因為我地有太多角色,但又無咁多時間。如果講要達成傳宗接代呢個目的,避免人類滅絕,係可以搵政府定期收集精子同卵子代為繁殖,然後唔駛有另一半,唔再有父母,每個人啲角色先減少兩個,咁就應該比宜家好分配得多。

其實以上嘅言論係好不知所謂,因為如果真係咁,其實唔需要人類,唔需要發展文明、科技,而人類淨係講對地球環境嘅影響就已經係百害已無一利。但可能係點樣喺有限、一直無多過嘅時間內,做不斷增加嘅事情嘅唯一方法?相信今時今日每個人最基本嘅角色有五個,子女/孫、伴侶、上司/下屬或老師/學生、同事/同學、自己,然後大家好努力,認為不斷延長工作時間可以獲得更多回報(金錢或職位),然後相信大家嘅目的都同樣,為左獲得更多嘅資源俾其餘嘅角色朋友,搵多啲想養頭家,再唔係就自私啲想自己過得物質上富裕。先唔講係咪一定成功,不過都計計數,由有量度時間呢樣嘢嘅果日到宜家2019 年,每一日都係只有24 小時,每一年都係只有365 日,每日返工9 小時(2 個角色:老細、同事),梳洗返工放工2 小時(1 個角色:自己),訓教7 小時(N/A),晚飯沖涼加埋俾盡你1 小時(食飯1 個角色,視乎對象)。每日淨係做呢幾樣基本嘢已經用左19 小時,你仲有5 小時分配,你可以加鐘俾老細同事,可以分俾屋企人或伴侶,仲有自己。

上面條數係minimum charge,最基本嘅角色數目同時間分配,星期一至五每日5 粒鐘俾你駛,無得累積,日日清,再加埋weekend 兩日扣起訓教時間,嘩咁計埋,好似都有好多時間丫。係架都,但未計埋你同對家嘅空餘時間是咪overlap,可以進行溝通,只要你屋企人或伴侶喺你放工得閒時返工,咁就少左機會,仲未計對家是咪都想將佢同你overlap 嘅時間分配俾你,咁樣再屈指一算,其實係無乜時間得黎,仲要難夾到時間同到人溝通。可能好多人就會講:「車,你想同果個人溝通,一定擠到時間架,藉口黎啫。」,無錯架,要擠要分配,一定得架,但又另一個問題,今日擠俾你,聽日擠俾你,後日又擠俾你,擠到幾多日先?擠得俾你,又要擠俾其他角色,唔講擠唔擠俾其他角色,擠得多又可以衍生其他問題,又厭啊又起爭執啊bla bla bla,咁仲擠唔擠先?

時間唔變,角色可以一直增加,講真,有幾多嘢你係好想做,但永遠都發覺唔夠時間去做?我成日提自己,唔可以俾藉口自己,特別係累。我覺得累呢個所謂感覺係自欺欺人,除左訓教,係可以做到其他嘢,但要靠自己嘅意志去爭取,唔可以一直俾「累」呢個感覺坐大。我中學有位英文老師我好佩服佢,放工後繼續上堂去讀書,跟住仲要跑步,上社交平台分享兼同同學交流,講緊佢到今時今日都仲係咁做。要知道宜家啲老師有幾咁忙,又備課又改功課改卷又開會傾下又要諗下worksheet 活動,我一直都好怕佢熬壞身子,但佢到今日都仲係同樣嘅生活,一放假就飛去第二度跑馬拉松,你話佢唔累咩?我睇過話休息除左訓教外,其實只要放低做左好一段時間嘅嘢,轉做第二樣嘢都可以係一種休息。

講講下又扯遠左,人實在有太多太多藉口除左角色分配外,我覺得仲有係溝通時嘅質素都係非常非常重要。Let say 你擠到一粒鐘同另一半食個快飯,但如果果一粒鐘你都係碌緊電話、覆緊公事或狂呻自己幾累幾慘幾辛苦等等,咁擠出黎俾你另一半嘅一粒鐘係完全廢嘅,因為你無好好感受享受呢一粒鐘嘅溝通時間。所有嘢好明確好專注,你分配得時間去做某一個角色,你就好好地做好,而唔係同時兼顧幾個角色,咁呢啲時間全部都係浪費時間。

點解文初我覺得減少角色會更適合現代人,因為限制於有限嘅時間,但有越黎越多嘅嘢想做,越黎越多角色,開始幾個角色會同時出現,影響溝通質素,具體例如同屋企人/伴侶食飯做公司嘢(角色:家人/伴侶+員工/同事)、同伴侶/朋友睇戲行街嗌自己好累好辛苦但又要俾人拖出黎周圍走(角色:伴侶/朋友+自己),錯鳩晒。既然唔識專注一個單一角色,好好溝通嘅話,咁就還原基本步去廢除一啲固定既有,一出世就有嘅角色,好好做好剩低嘅角色,同埋咪再增加咁多自己根本應付唔到嘅嘢,然後分薄晒本身獲得分配嘅角色。

 

作者:毋乜贊

九十後的怪人,點點情緒化,點點自大又點點自卑。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193453
Date: 2019-05-04 05:33:03
Generated at: 2020-02-29 12:44:20
Permalink: https://www.vjmedia.com.hk/articles/2019/05/04/193453/2020年代的人生角色