追求的另一半

 

 

現今香港好市儈好實際,下下同你講錢講樓講將來,錯?無錯,我唔否認錢好重要,樓好重要,講真,邊個唔想同另一半一齊住,可以多啲二人世界嘅時間,但上天好公平,無得咩都俾你要晒,你要賺好多錢,咁就失去寶貴嘅時間同健康,相反亦然。咁即係點?

我勉強叫活喺小康之家,細個老豆老母都返工,到中三我都係同菲傭姐姐相依為命,有時連佢放假,都會帶埋我出去。我同姐姐感情好好,比老母鬧老母打都係姐姐照我,我有咩都會同佢傾。然而當佢走左,我世界就得返我一個,由細到大雙親都無「出現」過無溝通無相處過,但由果時開始,我就要同佢地生活。每日返學放學自己搞掂,基本上無溝通,唔識溝通,因為根本無溝通過,加上本來嘅關係都已經唔好,咁就係我每晚都會喺房自己一個人,對住四幅牆,有時會自言自語,有時會啜泣,就係我同我自己。

過去嘅生活好富裕,有靚衫有車坐有玩具,基本上要乜有乜,開心啊,但同樣每晚我同我自己一個人,我同我自己傾計,我同我自己抱怨空虛難過……因為我無窮過,所以我唔會話想發達,我需要愛需要關懷需要時間,有幾多錢都買唔到。

好多人可能因為以前好窮,長大後要賺好多好多錢,就係唔想自己再好似以前咁窮,無問題,呢一樣嘢係每個人嘅選擇,而每個選擇都有後果需要承受返。當我有人可以陪我關心我,同我好好溝通相處,我唔可以怪對方無一齊為大家段關係賺好多錢;相反,當有人要賺好多錢去為大家時,都唔可以怪對方唔理自己。而我,或許從小到大,到宜家,我都只求有一個人可以聽我講下嘢,願花時間同精神同我溝通,了解我需要乜嘢,邊個唔需要人關心,而我可能係比平常人需要更多。

我成日都覺得一個人做唔到應承過你嘅嘢就只有一個原因,就係唔上心,果啲咩好忙唔記得,乜乜柒柒果啲,全部都係藉口,我老母以前發誓當食生菜,應承過嘅轉頭就忘記。而我係一個好敏感好細膩嘅人,我會俾好多好多次機會,會記得每一次被遺忘嘅藉口,當一件事累積多次,再加上越黎越多事累積,就將會係我嘅導火線,如果應承過講過嘅都當無件事,咁我要你應承黎做咩?我要求得,其實就代表我認為果件係一件重要嘅事。如果我講過嘅都唔係啲乜,我相信我呢個人都唔算得上係啲乜,因為我都唔知點解仲要同一個已經唔理我感受,唔理我講咩嘅人一齊。

我人比較怪,返工點都好,我放工就可以忘記,我會花好多心神同時間喺同另一半嘅相處上,我喜歡同佢講我每一日發生嘅所有瑣碎事,我喜歡聽佢講佢返工嘅所有嘢,我喜歡大家可以好好溝通,而唔係例牌對白早晨食飯沖涼早抖呢幾句,我需要嘅係好多好多。我討厭對方無精神同我溝通,我討厭對方次次放假嗌累想訓多啲唔見唔出去郁下,我討厭出到黎又沒精打彩你眼望我眼。我係好demanding,但要記住,我從來無要求過要過咩富裕嘅生活,我唔係有樓有高潮,我唔係要餐餐食omakase,我唔係要好多錢去維繫嘅一個伴侶,但我需要嘅係比金錢更難搵嘅時間同精神。食快餐食food court 食車仔麵,我無問題;行山打波做運動,我無問題。時間同精神,其實好難。

如果有人將我嘅說話放上心,肯俾時間同精神我嘅人,已經好容易打動到我,但呢啲人或許到現時為止,我只係遇過兩個,一個我前度,一個我現任。前度之所以係前度就好簡單係因為大家再俾唔到大家想要嘅嘢俾對方,而現任係現任就係喺咁嘅香港社會,仲識到一個人肯俾到佢嘅大部分時間同心神你。女友送我一隻我成日話想買但又唔會買嘅Apple Watch 俾我,我好記得佢當時講左一句:「送隻錶俾你係代表我會俾晒我所有嘅時間你,但要記住,我同隻錶一樣,都係需要叉電。」。

手錶,意義上可以係價值可以係時間,但有時價值幾高都好,時間嘅多少都唔會有所影響,而往往我想要嘅,都只係陪伴我嘅時間,而唔係啲乜。

 

 

作者:毋乜贊

九十後的怪人,點點情緒化,點點自大又點點自卑。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193472
Date: 2019-05-05 05:01:47
Generated at: 2019-09-24 02:47:17
Permalink: https://www.vjmedia.com.hk/articles/2019/05/05/193472/追求的另一半