愉快嘅童年係有錢都買唔到

 

 

「你一啲進步都無!速度、技術、動作全部都無進步!你學嚟做乜?你知唔知好貴㗎!你嘥晒我啲錢呀!一啲大志都無!求求其其落水游幾下,我比幾蚊你去泳池游唔好?成年喇,一啲進步都無,你話你有無用吖你?你講吖!」

「你又搣指甲!我叫咗你唔好再搣㗎啦!十隻手指都比你搣損晒,你話你樣唔樣衰吖?唔好再搣啲皮喇下你!真係比你激死,叫你做你唔做,叫你唔好做你就偏去做,你而家係咪同我作對呀?係咪呀!你鐘意搣吖嘛,我幫你搣囉!搣死你!」

怪獸阿媽由上車鬧到落車,啲語氣仲要好差,一時好惡一時單單打打,仲要係咁用推佢隻手或者篤佢個頭,眼見坐我隔壁個妹妹全程一粒聲都無出過,淨係耷低頭搣手指甲同皮,我喺隔離都戥佢難受,真係唔怪得咁多小朋友有抑鬱症或者焦慮症,我諗呢個妹妹只係冰山一角。到底佢其實鍾唔鍾意游水?點解比人鬧都唔出聲?係咪因為壓力而搣手指?我唔知,我淨係知而家做小朋友真係好辛苦。

其實每個人細個都實曳過,實比人鬧過,我都有,滕條炆豬肉都食過添,但係通常好快就會無事,亦唔會每日24小時都比人鬧,通常成績差先鬧幾句。屋企人讀書唔多,所以都無乜管我,雖然都有叫我上興趣班,學畫畫、煮嘢食、珠心算等等,但係我無樣學得叻,真係當「興趣班」上下。每日我放學就係去買魚蛋燒賣食,跟住去公園玩捉伊因,再去小童群益會做功課,星期六日打下羽毛球,做下街童好快又過一日,而家諗返起我都好慶幸我嘅童年係開心嘅。

我以前都有讀書壓力,但我好記得嫲嫲講過嘅一句說話,就係「盡咗自己能力就得喇」,每個人嘅資質都唔同,優點缺點都唔一樣,有時死迫爛迫都無用,分分鐘迫死人,就算細個練到十項全能又點?大個咗出嚟呢個社會做嘢咪又係由零開始,你科科攞A都無用,唔識同人相處一樣會比人玩死,入大學都只係一張入場券,做人處世嘅嘢真係要學一世。

呢個社會愈來愈不知所謂,教育制度愈改愈亂,政府令到各個方面都好大問題,個個怨聲載道,當你知道咩都改變唔到嘅時候,你就會開始諗不如做下港豬開開心心食好西仲好啦,人生苦短,開心真係好重要,仲有就係千其千其唔好亂咁生小朋友,真係會害人害己。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193479
Date: 2019-05-05 19:35:09
Generated at: 2020-02-21 08:56:40
Permalink: https://www.vjmedia.com.hk/articles/2019/05/05/193479/愉快嘅童年係有錢都買唔到