正能樣的數學問題

 

啲正能樣既核心矛盾係乜? 就係,當常人覺得做任何事,搵到個正確方向去做,係基本技能時,佢哋覺得自己冇行錯方向已經叫成功人士。 即係,今個quarter 我攞到十分喎,冇俾人扣五十分,而且多過零分,俾啲獎聲自己!咁但,正常人類係有計劃有預謀, 往年攞60分,年尾回顧,得50分,就算係外圍因素影響,都要搵出問題喺邊度,期望下次趨吉避凶。

講得具體啲,即係,正能樣個問題,就係唔熟數。佢哋覺得有中學生嗰種乜嘢係 -ve 乜野係 +ve 「辨是非」 既技能,就已經係懂得世界真理嘅全部,而自我感覺良好。

例如,其實我不嬲唔討厭賣保險、直銷嗰啲的。但係唔該睇下數:例如某老字號直銷公司,喺香港號稱一年賣洗頭水、電器,一年五千萬營業額。oh wow,即係幾多?加減乘除:求其一個大型屋苑間超市,一年365日,每日每個客平均使舊零水,一間舖每年都唔止出五千萬貨啦。

然後你直銷講緊用幾百幾千人,仲要喺香港做咗幾十年,先得 0.1% 市佔(香港超級市場2018年賣貨 529.7 億,都仲未計電器)。我唔係反對直銷,係反對低效率,廢囉。然後正能樣話,唔係啊,我地搓完,起碼出正數喎!More than zero! Yeah!

用劉慈欣《三體》科幻小說嘅角度嚟講,即係宜家太陽系出現黑洞,全香港九龍冇得避。 你話你 actively 揸緊架太空船向緊太陽系以外方向飛, 所以有正能樣,兼且我唔可以話你做錯。 但係黑洞 個逃逸速度係光速,然後你飛得嗰每秒幾十公里, 就「有嘗試就不算失敗」at least I tried,「搏盡無悔」。

可能我太 mean,個要求係太精英主義。正常人只係想輕輕鬆鬆,安定搵夠就算。就算當年蒼井空個擇偶要求,都只係「每年」有得去旅行, 而我哋啲香港人(例如李聲揚) 係講緊「每個月」去一次日本。

咁做唔到本身唔緊要。人各有志(冇都唔緊要既,但)個腦癌位係,啲「正能樣」覺得自己同「傳統精英」係平起平坐,一樣咁成功,「沒有誰比誰高尚」就真係,well,香港由頭到尾都係危機、恐慌中嚇大的。

 

 

作者:技術官僚主義者

技術官僚主義者
讀政治經濟學出身,其實對時事冇興趣,入行純粹因為比較好搵

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193751
Date: 2019-05-11 05:11:49
Generated at: 2019-07-17 05:35:21
Permalink: https://www.vjmedia.com.hk/articles/2019/05/11/193751/正能樣的數學問題