感情結束後嘅傷痛程度,只係視乎段感情嘅長短?

 

 

「我同女朋友分開咗,好唔開心。」 一位20出頭嘅少年,暫且叫佢做A先生。
朋友問︰「點解呀?」 「佢覺得我未夠成熟,比唔到佢需要嘅野。」
朋友「安慰」A先生︰「唔好咁傷心啦,你地都係拍左拖一個月左右姐,好快你就識到第二個嫁啦。」

睇到呢度,大家可能覺得佢朋友講得好啱。一個月感情,會深得去邊呀?又會痛得去邊呢?
的確,一個月時間太短,唔足夠比大家經歷太多。但係一段感情,只係用時間量度深淺咁簡單咩?

正如有人打同一個行業10年,都可以話轉行就轉行;有人做左同一行2年,佢知道其他工作可能更輕鬆更賺錢,佢都從不放棄。又例如一隻錶陪左你5年,有人會抱住壞咗就換嘅心態,亦有人選擇死都要整返佢。除左時間之外,你係段感情入面投入咗嘅所有野,同埋你對段感情嘅心態,都係影響緊呢段關係對你嘅重要性。

我見證住呢一位A先生,由當初滿腔熱血,好有誠意咁為將來而嘗試各種不同嘅改變。到而家,失去晒所有方向,甚至連工作上都極度迷失。佢所失去嘅,唔單止係大家口中嘅一個月感情,而係佢唯一嘅目標。因為從拍拖果一刻開始,佢做嘅任何事都係為左一個人。佢嘅世界,只圍繞一人轉。

以前,A先生係一個洗好多錢嘅人,完全唔會諗儲蓄。但認識左果位女仔之後,佢竟然開始計劃將來。不斷計住唔同嘅數:而家賺到幾多?幾時儲夠錢買個佢最鍾意嘅袋比佢做生日禮物?幾時儲夠錢買隻一卡嘅鑽戒求婚?又幾時先可以儲夠錢結婚?而為左可以盡快搵多啲錢去做到呢幾件事,佢甚至想轉行,或者打多份part time嘅工。

可能你會覺得,洗唔洗呀?啱啱開始就諗到咁長遠?但係我可以同你講,呢一位20出頭,人地覺得佢仲有大把時間玩嘅A先生,根本就冇諗過玩。佢個腦入面只係諗緊點樣可以令佢女朋友更加幸福。

可惜,好景不常,始終都行到要分開呢一步。呢件事完全影響晒呢位A先生嘅思維同判斷能力。佢以前非常喜歡佢做嘅行業,係果一刻,佢居然想放棄一直以來佢嘅夢想工作。佢以前亦不信奉鬼神之說,但到咗呢個時候,祈禱、戴水晶、十字架、御守、西方神明嘅鐵牌、調頻,樣樣齊。佢真係完完全全咁失去左自我。

係呢個極度迷失嘅情況下,佢好好彩,搵到神婆。透過塔羅牌同神婆嘅幫助,佢終於慢慢搵返少少方向,係少少咋。最起碼佢冇放棄到佢老本行嘅工作,真係要多謝神婆拉佢上黎。

A先生嘅故事未完,我地就睇下呢位人兄以後會點。究竟佢只係世人口中嘅「少年你太年輕了」,定係佢真係一把「癡心情長劍」?下集再講多啲A先生嘅背景。

「緣慳 但是人非草木並不會太易慣」 — 何韻詩《木紋》

 

作者:未亡人

一名廢青,冇目標冇夢想,行事全按心情。偶有迷失之時會尋求神婆指點。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193785
Date: 2019-05-11 05:29:26
Generated at: 2019-07-17 05:30:38
Permalink: https://www.vjmedia.com.hk/articles/2019/05/11/193785/感情結束後嘅傷痛程度,只係視乎段感情嘅長短?