熱門文章

    【塔羅個案】其實做左咁多年人,如果無一個對象可以聽自己講野都幾慘

    文教 / 最新文章綜覽

     

     

    都市人誰不寂寞。又或者應該咁講,就算係小朋友都會有感到寂寞的時候,人類本來就沒有自己想像到嘅咁堅強,係,一個人係可以喺衣食住行度照顧自己,但係心靈上總會有倦下來的時候。

    好多客人會黎問人際關係。

    你可能會話,「有咩好問呀?同人相處都唔識呀?」無錯,就係唔識,因為唔識,所以好用力,喺每一段關係入面,都好想比人留意到自己、好想話比其他人知自己有咩吸引之處。但係,正正係因為太用力,所以好多時候,一係令人反感,一係令人心諗做乜勁;總之,就係換不來自己最想要的「想有人聽我講野」。

    當然,可憐人必有其可恨之處,我亦自問未至於大愛包容到「我可以和所有人當朋友喔」咁樣;我亦明白去同一個「交朋友交得很用力」嘅人去解釋「其實同人相處應該自然啲,要雙向,無得夾硬黎」係一件無咩作用嘅事。

    不過,有人問我,我就會講,一講再講,因為,黎到呢度嘅客人,如果連我都唔同佢講真話的話,可能根本無人會話佢知「其實咁樣唔係咁好」。

    相信大家身邊都有遇過「單機人」或者「話題終結者」,前者即係話佢會喺群組或者網上面自己同自己講野、自己覆自己留言、自己講自己野,完全唔理其他人點諗;後者即係好地地一個話題,去到佢度,就會突然間收哂皮、靜哂之類。

    以前有 Xanga,之後有 Blog,大家有咩個人想法想講,咪打出黎囉,唔想比人睇到咪較 Private;不過,自從有左 Facebook 之後,你打完出黎嘅野,如果無 Like,或者少 Like,有啲朋友就會好唔開心。

    說到這裡,我想提一提我專頁的 Inbox。

    我係一個好懶嘅人,我有咩都淨係會打喺個人 Facebook 上面,個 Page 基本上就淨係用黎做預約、出店務公告之類,真係無乜用心去經營;慶幸生意過得去,Inbox 每日都會接到一定數量短訊,當中有預約的、也有客人匯報近況的,但係,同時,會有人喺度,對住我,打佢自己嘅事。

    試過有網友每日打洋洋幾千字到我 Inbox,講一啲自己嘅野,例如公司比人蝦,朋友要結婚,今日食左新口味雪糕好難食之類,而佢本身唔係我嘅客人,亦唔係我認識嘅人。

    助手有時會好無奈,隔一排就問我「駛唔駛 Block?」;然後,好多時,我諗一諗,都係苦笑一下,「由佢啦。」

    一來佢又唔係 Harmful,二來,佢開得一個 Account,就可以開第二個 Account;「Block」呢個 Action 可以話有用,亦可以話無用。你問我會唔會覺得反感?一時時吧,但是更多時候會覺得,他有點可憐。

    到底係幾無朋友或者幾寂寞,先要同一個陌生人日日好似打 Report 咁講自己近況?當然,會做到咁嘅人,一定就無諗過對方想唔想聽架啦 LOL 而又好老實講,我亦唔係第一次遇到呢種人,呢種「自說自話」然後想你理佢嘅人。

    我只能夠講,關係嘅野,無得逼的。我早前亦都寫文講過,關係,係雙向的。唔係一方面用力,另一面就會有人撲出黎應機的。

    問心,唔好逞強,假如你身邊無可信任朋友、或者無可以放心依賴嘅對象,有時,會唔會係自己有野可以改善呢?會唔會就係好似我所講,你係一直好用力咁去表現自己呢?你係想去認識人地,定係,你只係想人地理你呢?

    當然,明白呢一點嘅已經做緊,而唔明白呢一點嘅,無論你開幾多次牌,都唔會揭完牌,我就馬上憑空變個朋友出黎比你。

    有時,沒有人聽你說話,不如先靜下來,由你,和自己好好對話。

     

    【塔羅牌個案分享】

     

     

    作者:神婆

    神婆
    非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

    閱讀後覺得好,請多多讚好及分享~:)

    其他熱門文章

      歡迎讚好我們的facebook page,免費資訊源源送上。

      文章資訊

      ID: 193796
      Date: 2019-05-12 05:02:38
      Generated at: 2019-05-19 17:48:31
      Permalink: https://www.vjmedia.com.hk/articles/2019/05/12/193796/【塔羅個案】其實做左咁多年人,如果無一個對象