熱門文章

    做人做狗做乜都好,最緊要有自己嘅位置

     

     

    自從住hall之後,好日都唔翻屋企食飯。今日翻到去食飯,比老豆疾咗幾句,有啲唔開心,但又有少少爽,總之有啲難以形容。

    真係好日冇翻去,所以屋企特登整左餐勁嘅,不過唔係重點。擺滿成圍檯,偏偏我呀妹仲未翻。咁我問老母啦:「喂,你個女溝仔仲味翻呀?」母親望望手機「今日星期二,打波呀,邊有咁早呀。」老豆:「溝咩仔,依家先中二。」

    哦,原來今日放學後練波。好啦,終於等齊人,埋檯起筷食飯。冇見一排,心思思諗住激下個細妹(個個呀哥都係咁㗎喇,一有機會就想撚下啲細佬妹。)

    我問:「你係咪打後備姐,生得咁矮,咁屎波點打排球呀。」

    妹:「哼,你咪理,我有正選打,你果陣冇。」

    我:「屌,你又知我果陣冇?」

    主角終於開聲,「你唔好笑,打後備有咩問題?你唔係睇開籃球咩?早幾年雷霆咪有條友仔叫哈登,攞左最佳第六人,邊個話後備唔緊要?次次關鍵時刻,救亡佢都有份㗎。依家好似響火箭打緊正選啦。」

    我:「喂,乜你日日返工,幾時得閒睇波?」

    老豆:「枉我供你讀咁多書,報紙你識唔識睇?」

    老母:「哎呀,飲多啖湯啦,我煲咗成日嘎喇。」

    老豆繼續講:「做人做狗做乜都好,最緊要有自己嘅位置,如果你測驗、留堂、炒車,打唔到場波,你班隊友都照贏,一係對手太廢,一係隊波根本唔多需要你。那,果個咩JR 史密夫,就係打唔打都唔緊要果種人喇。」

    「我雖則話做三行佬咋,但我請親假,老闆都頭曬痕㗎。如果你缺席,會搞到教練抝曬頭嘅,咁你咪係一個有價值嘅球員囉。」

    呀妹轉個頭埋黎,搖咗幾下頭:「係囉,你得唔得呀,識話人唔識話自己。」

    老豆:「呀妹,過多幾年到你笑佢啦,你呀哥呢啲文員仔,冇翻工都唔會有人為意,求Q其都可以搵過件頂佢啦。」

    仆街,老豆呢招連消帶打,嘢嘢打中要害。啤左呀妹一眼:「呀喂,上次戲院條仔溝到未啫?」

     

     

    作者:迪奇木

    90後,全職廢青,兼職宅男,人稱學渣。想用筆墨紀錄筆者生活有幾咁頹廢。

    閱讀後覺得好,請多多讚好及分享~:)

    其他熱門文章

      歡迎讚好我們的facebook page,免費資訊源源送上。

      文章資訊

      ID: 193808
      Date: 2019-05-12 05:18:52
      Generated at: 2019-05-19 17:47:35
      Permalink: https://www.vjmedia.com.hk/articles/2019/05/12/193808/做人做狗做乜都好,最緊要有自己嘅位置