我去咗睇教母 Serrini 個演唱會呀!

 

我想講呢,今晚好開心呀!因為呢,我去咗睇 Serrini 個演唱會呀!

 

話說發售當日,開售前五分鐘衝入公司厠所(開工唔俾用電話呀),入定個網一夠鐘就就狂㩒個電話,㩒咗五分鐘先入到,但777元嘅VIP位無晒囉……最前都只係480元崇拜企位,唯有早啲入場可以企前啲,但佢啲泥民癲㗎,show前兩小時已經有人排。我從來未睇過一個咁癲嘅演唱會,Lady Gaga都係Mama,但都唔夠哩位妖姬女皇嚟,同邪教一樣控制晒班信徒,真係當個SHOW係邪教咁玩。

要我地dress code係beige、白色及淺色,眼見8成人都好聽話,變成一片肉海。入場及散場嘅情境就好似中學生返學及放學咁(我中學係白色校服㗎),啲年少回憶返晒嚟。最勁係佢以女皇身份同泥民fans嘅互動,777VIP被選中嘅子民竟然有份參與開場儀式,又命令泥民分紅海俾佢當通道行,又鞭打大家,而我地係好受落哩位教母,我地嘅媽咪~

 

dress code 係beige、白色及淺色

 

介紹返哩位教母,佢有太多稱號,你地自己去搵啦,而我地依家主力叫佢媽咪。

佢嘅曲風一開始就同好多少女一樣行純情小清新,用甜美聲線唱出少女心事及日常,《蘇菲亞的波霸珍珠奶茶》簡直係神曲,如果佢個show唔唱啲迷會反轉個場囉,《給睡了的人》就像可愛小妹子叫醒啲係腐敗政治中睡著嘅人,俾我感覺佢係香港嘅Lily Allen,用甜美歌聲去鬧爆啲嘢。

然後變了躁底cute妹,《請小心車門》、《你條茂利放飛機》唱出日常你會想鬧爆嘅生活日常躁底事。仲係小清新嘅佢,開始唱有啲灰歌《抑鬱十二月》、《黑仔歌》,但係唔知佢知唔知唱出好多抑鬱仔嘅共鳴出嚟。

我真係好鍾意《Don’t text him》哩隻碟,《哀樂無名》、《放棄治療》、《青春荒廢》、《Let us go then you and I》,身邊有認識嘅情緒病患者都同我一樣係哩幾首得到慰藉,咁啱《Don’t text him》及《我可唔可以唔好咁樣》道盡我嘅心事,係咩就你自己聽下咪知囉~再走下來就係同Ruby合作組成嘅GTB,好貼地咁樣將高崇港女離地生活及想法一一道出,喂呀~好搞鬼㗎,一定要聽哩兩個bitch唱嘅兩隻碟呀~

到現在啦,出咗《邪童謠》隻碟後,佢正式成為妖姬女皇,loop住隻碟就好似帶你去咗另一個領域,感受妖女氣勢,完全臣服於媽咪,自己都會想成為妖女一份子。不過有一首歌我覺得勁正:《靜謐神林》,閉上眼聽,會帶你到另一個仙境,充滿靈氣嘅仙境,靜化心靈。

佢點進化都好,佢嘅歌詞都係咁貼地、跳脫,一個歌手可以唱作,令人共鳴,再去令人臣服,暫時係哩個年代嘅香港只有佢做到。

 

 

媽咪係好識安慰啲gurl(我無串錯),follow佢尤其IG STORY一定要追睇,有時會介紹好物俾我地,又教我地點樣自信,又會教啲gurl點對啲fuck boi(都無串錯)其實佢係好窩心嘅媽咪,除咗FB及IG,佢仲會好照顧TG GROUP嘅FANS,唔會話見你地9UP就放埋一邊唔理,佢會9UP埋一份。你話,點可以唔臣服於妖女媽咪?

 

 

作者:紫玥

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 193821
Date: 2019-05-12 05:50:00
Generated at: 2019-07-17 05:33:03
Permalink: https://www.vjmedia.com.hk/articles/2019/05/12/193821/我去咗睇教母-serrini-個演唱會呀!