熱門文章

    宅男的公仔機攻防戰——兩爪惡魔(下篇)

     

    上回可以睇呢度:兩爪惡魔(上篇)

     

    「當你了解左呢部兩爪機之後,就會發現夾公仔其實冇想像中咁困難。」

    兩爪機設計其實對初學者並唔「Friendly」,因為爪既移動方向、距離以及高度有限,加上只有兩個制既「簡單操作」,唔可以做到逐下逐下對位落爪,大幅增加難度。而且每部兩爪機都會因應目標物作上唔同調整,務求想大家入多幾個Credit增加「刺激性」。

     

     

    當決定好位置(對位)(正正因為爪力同設定對玩家不利,所以兩爪機對位要好精準先有能力令目標有效地移動,明白原理之後可以交少好多學費架!)落爪後,左右兩隻爪就會好似呢張圖藍色筆咁樣「開爪」進行落爪,而落爪既深淺度(即係收爪既時間)取決於部機既Setting——

    正常情況下爪會打開到黑色線位置後垂直落爪,落爪後掂到公仔就會收爪。

     

     

    一部無調教過既夾公仔機其實可以一下就將目標帶走,但以上經過精心設計既爪就需要配合落爪技巧先有效地帶走眼前既目標。

     

     

    當沿住公仔既邊緣位置(綠色線)Or 接近中心點位置(藍色線)落爪既時候,我地可以利用收爪一瞬間既力度將公仔抽起,從而做到明顯既移動效果,橙色圈就係筆者會嘗試落爪既位置。

     

     

    上圖既情況,除左可以利用收爪果一刻將Melody同粉藍色兔兔輕輕抽起之外,我地仲可以利用落爪時既深淺同力度將公仔向下壓落出口。

     

     

    不過壓既時候我地就要因應番目標物既大細、以及深淺度去選擇用爪(紅圈)定係本體(藍圈)壓落目標。

    兩爪機既玩法千變萬化,但都一樣離唔開對位、落爪同收爪呢三部曲,與此同時亦因應唔同既玩法/目標物衍生出更多變化既技巧。

     

     

    呢個膠圈雖然睇上去無咩用,番到屋企你就會剪左佢 。當爪力近乎無既時候就可以對住膠圈落爪,用爪勾住呢隻公仔從而做到移動效果,但公仔太大的話就無咁有效。

     

     

    多數情況下,成功勾住公仔(無論係膠圈定係公仔條繩)都當會你夾到。(只限美國冒險樂園)

     

     

    雖然勾係一件唔容易做到既事,但已經有人專登收埋呢條救命繩…..

     

     

    香港甚少有兩爪機可以俾大家直接夾有包裝既Figure,主要都係因為「錢作怪」——成本高之餘唔多人有興趣。

     

     

    如果大家去日本玩兩爪機而見到呢種包裝既Figure,不妨落爪篤落呢d脆弱邊緣位置,同樣可以做到勾既效果(因為你係直接篤爛個盒)。

    目前香港有兩爪機既地方唔多,筆者我都簡略講下呢幾個地方既兩爪機啦!

    美國冒險樂園: 價錢比較貴(約13蚊1 Credit),機台主要夾中小型公仔,但爪力同其他設定係咁多間之中最有良心既,你仲可以叫Staff換款架。

    Namco:價錢同玩法貼近日本,6蚊就有1個credit之餘仲好多玩法,無論大小公仔甚至Figure都有得夾。但因為爪力同其他設定都極為「苛刻」,去玩之前要抱住一個荷包大出血既準備。

    Molly Fantasy:7蚊1個Credit,雖然係Joystick控制兩爪機,出口位既擋板高之餘爪力亦唔夠 ,可能因為同Aeon有關所以唔洗執笠掛?

     

     

    萬中無一既Namco戰利品,只係因為Set錯機導致我可以5 Credit搞掂。

    老實講,呢篇文唔係可以令大家百發百中既「夾公仔秘笈」,只可以令大家面對呢d精心設計既賺錢機器「更有效率」夾到心儀目標。因為機既爪力同其他設定唔會因為你入左好多Credit而有任何變化架,所以我地要利用以上兩爪機既特性去有效地「夾公仔」。

     

    如果咁多朋友想交流下心得或者有問題問可以隨時搵我架~

     

    作者:陽光宅男

    陽光宅男
    人如其名,只係一個有陽光氣息既宅男,鐘意打機9up講笑話但懶到出汁,保證大家完全估我唔到。FB PAGE 陽光宅男Ken

    閱讀後覺得好,請多多讚好及分享~:)

    其他熱門文章

      歡迎讚好我們的facebook page,免費資訊源源送上。

      文章資訊

      ID: 193834
      Date: 2019-05-12 18:44:58
      Generated at: 2019-05-19 17:42:26
      Permalink: https://www.vjmedia.com.hk/articles/2019/05/12/193834/宅男的公仔機攻防戰-兩爪惡魔(下篇)