熱門文章

    你估我真係想搞尖沙咀六四?

     

    尖沙咀六四

     

    小弟今年第二年搞尖沙咀六四,容總立即回我一句「你真係好得閒」。

    實情係,我都不知幾唔得閒。我淨係搞兩壇生意同啲倡議嘢,廿四個鐘都唔夠用。而且,搞壇一個鐘都唔夠嘅嘢,要洗幾千蚊租個場,再俾康文署班官後追幾千蚊保險;之後果啲覺得我搞集會獨攬嘅KOL,冇建樹又出嚟酸兩句。悼念仲要搵人搞個台、音響、蠟燭同買花;得番兩個禮拜,你以為易搞?咁點解仲要搞先?

    係啖氣呀!

    2013年,陳梓進同鍾健平一齊搞尖沙咀第一個六四。為嘅當然係悼念一眾喺北京為自由而獻上生命嘅人。尖沙咀嘅六四,係認同民主自由人權等嘅價值,但同時亦都係拒絕將「愛中國」同悼念綑綁埋一齊。悼念就係悼念,就係堅持普世價值。國際人權組織都係用將涉嫌違反人類嘅人繩之於法,作為對六四慘案嘅訴求。至於搞特別法庭定係推到上國際刑事法庭,就真係各適其式。

    此乃第一啖氣。殺人者未受制裁,呢啖氣一定唔會落。

    而至於「建設民主中國」呢家嘢,真係太大責任喇。香港人連自己地方嘅民主進程已經死晒,仲邊有心力搞民主中國?二嚟係,民主化嘅中國,你估一定會對香港好?大家望吓全地球行中央同地方制嘅民主政體,有邊個地方政府尋求更大自主果陣,唔係係俾中央政府打壓?

    立足點唔同,但大家都係悼念,其實互相珍重就好。誰不知啲泛民大佬覺得呢班人係搞事、係拆大台,更加喺自己唔同嘅位置,去唱衰、去擋住甚至打壓呢班人;人哋對人類文明良知一番善意,大佬們就嚟「唔跟大隊就係鬼」上身,咁好咩?2017年,政權打壓尖沙咀六四到連搞都搞唔成,試問大佬們又有冇仗義發聲?都算。你哋當中曾經鬧天安門母親嘅人,風頭火勢過後就做番常委,咁又對呢班冇咗仔女嘅爸爸媽媽好咩?

    此乃第二啖氣,因為我哋只係立論唔同,仍然堅守良知,但都要硬食。

    其實香港人喺咩地方悼念都冇所謂,六四悼念最好係遍地燭海。我只係做一個人,一個眾集燭海嘅人,令守住良知嘅人喺暴政下唔會覺得孤單。

    六四,自由戰士像前見。

     

    P.S. 係,因為當場籌款文化中心會抽佣。如果你希望支持吓啲洗費,請聯絡我,感激不盡。

     

    作者:巫堃泰

    巫堃泰
    香港大學法學(人權法) 碩士,香港機場發展關注網絡發言人。曾參與香港電台節目評論時政,並經營民間網上電視台。熱衷公共政策及管治研究,從過去到現在積極參與公民社會組織及倡議,創造多項時政惡搞產品,期望用創意改變社會。

    閱讀後覺得好,請多多讚好及分享~:)

    其他熱門文章

      歡迎讚好我們的facebook page,免費資訊源源送上。

      文章資訊

      ID: 194016
      Date: 2019-05-16 14:00:13
      Generated at: 2019-05-19 17:48:35
      Permalink: https://www.vjmedia.com.hk/articles/2019/05/16/194016/你估我真係想搞尖沙咀六四