離開是為了回來

 

最後,講啲野畀大家聽丫。

你中唔中意抖架?

直至去年十一月,我都唔係好抖既。結果,我個頭殼頂話畀我知,我再唔抖,會死。

幫我剪頭髮既哥哥就話,我有鬼剃頭,已經唔係第一次,係第二次。個窿,仲越黎越大。

醫生話,呢d 叫生活壓力。

 

以前,我記得我屋企人係點教我既呢?我好記得,我細個既時候,一日要背十個生字。一定要背左,先有得訓。有時候,我訓左覺,我阿媽會摷醒我。我會好似癲左咁樣,衝入個廁所度,刷牙,洗面,然後我睇一睇個鐘,原來只係夜晚既十點半。

我以為,係早上既六點。我係每日六點起身,刷牙,洗面,準備返學既。

即係話,仲返緊小學果陣既我,係唔知自己訓左幾個鐘,亦都唔知自己休息夠唔夠既。

但係,因為你窮,因為你屋企人覺得你唔讀書就冇用,因為你有好多野未做完,所以你抖,你訓覺,你都係有錯既。

最近,終於都有志願團體發現呢件事。我既學生,都係中意鬥唔訓覺既。因為,佢地發現,即使佢地成績唔好,只要你出黎同佢講,我四日冇訓覺啦,咁你身邊既人,就好似冇左一個道德高地去責難你。而任何人跳出黎講:你冇得訓係因為你能力差之嘛,都會被視為係「冇同理心」。而慢慢,大家都係度鬥唔休息。然後,大家開始鬥晒病歷,精神病既,濕疹既,內分泌失調既。你有晒呢幾樣,你都冇資格出黎鬥慘。你要曾經係com lab 度暈低過,你先叫做「無悔今生」。

幾時開始,我地將休息,當成係一種錯誤?

幾時開始,我地覺得呢個世界既人,休息,就係懶,就係冇用?

 

今日有單新聞,係咁講既

突破機構於去年10月至12月,進行名為「『逆休息』文化與青少年倦怠」研究,以街頭訪問形式,成功訪問1221名10至29歲青少年,發現逾四成受訪者處於「逆休息(Anti-rest)」,即對怯於或抗拒休息的狀態,令休息本末倒置地成為壓力來源。

負責調查既幹事就話,大部分人都認為休息是減壓良方,但社會對休息的錯誤觀念,如「勤有功,戲無益」,以及家長從小到大灌輸「不要玩,快溫習」的觀念,令青少年貶抑休息的價值,誤會休息等於浪費時間,故必須完成溫習、工作後才能休息。

面對呢單新聞,好多記者就搵黎社會上既成功人士,出黎講好多大道理,咩休息係為左走更遠既路,考試唔代表一切。我明白,亦都合理既。唔使考試既人,梗係會叫要考試既人,要好好休息,唔好當考試係一件好重要既事,話考試衰左唔使死云云。講呢d 說話既人,亦都唔會將佢既手伸長,去保護果d 係制度上失敗既人。果d 考唔到個試,就一無所有,被社會當成係廢青,同垃圾既人。

成日話個世界有好多路可以揀。就算你要做youtuber 都要有部機拍有部機剪丫?好多好似好平常既野,其實都有一個入場門檻。

究竟,我地應該點做,先可以叫大家唔好迫死自己?

而我又有咩資格咁講?我先係果個一星期做七日,去旅行都照做野,將所有我既生活都變成工作既人。我憑咩叫人講,休息好緊要?從小到大,我地睇好多所謂成功人士既例子,都係話畀你知,瞓覺係浪費時間既,你係呢個森林定律既社會競爭,你就一定要好好咁去裝備自己。你有冇聽過龜兔賽跑既故事呀?兔仔就係因為瞓覺輸架!你點解敢瞓覺呀?

問題既癥結係,剩係叫學生要懂得休息,唔將成個將競爭放到最首位,輸左場試就等如輸一世既社會氛圍同結構改變,叫學生休息,同叫佢「你不如認命啦,你冇人地咁有錢,你冇人地咁叻,你註定係咁冇用架啦」,其實又有幾大分別?

 

今日,我再去剪頭髮,我髮型師同我講,我個窿生返啦。我一路睇住塊鏡,反射我頭殼頂既狀況,我一路係度恨自己。點解咁唔受壓,點解咁冇用,點解要抖。點解唔迫自己做多d 做多d 做多d 做多d。

點解我做唔到。

點解。

其實,唔得,就係唔得。叫人休息,真係好容易。但休息之後所出現既痛苦,煩惱,後續要處理既問題,又有邊個幫我地去處理呢?

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194025
Date: 2019-05-16 19:15:56
Generated at: 2019-07-17 05:34:03
Permalink: https://www.vjmedia.com.hk/articles/2019/05/16/194025/離開是為了回來