【塔羅個案】用健康、甚至以死相脅去叫一個人鍾意你,真係好咩?

文教 / 最新文章綜覽

 

黎到今時今日呢個世代,已經無話「女性要等男士邀約」呢啲老套野,市場競爭激烈呀,唔少女士遇到心儀或感興趣對象,都會選擇主動出擊。

咁但係,出擊還出擊,乜野「男追女隔重山,女追男隔重紗」呢啲野,其實已經唔係太關事。就算係女仔主動出擊,都會有大把撞板嘅時候。

我成日同啲客講,你餵檸檬比人又好,人地比檸檬你食都好,起碼,你都仲有「檸檬」嘅出現,有好多朋友連檸檬皮都見唔到。又,食檸檬又如何,咪再接再厲,反正人夾人緣,世事無絕對架嘛。

不過,如果人地比檸檬你,你拎把刀出黎兇返人地轉頭,秦沛上身咁樣「你大我呀?」,其實,真係會有效果咩?

唔少朋友可能都遇過或者聽過「一哭二鬧三上吊」嘅人或故事,而今次分享呢個 Case,聽到之後,我個白眼反到上太平山。

黎搵我求救嘅,係一個感情經驗唔多嘅後生仔仔,姑且稱佢做 Sam。

Sam 本身有一心儀女子,目前互相認識當中。Sam 份人都幾鍾意做運動,所以有時會同朋友一齊去打下波咁樣,然後早排,有朋友嘅朋友嘅朋友(好遠呀啲關係),一個後生女仔,湊腳黎一齊打波,因此同 Sam 認識。

因為要約時間集合,所以呢個女仔——稱呼佢為 Cammy 啦,就加入埋 Sam 波友嘅 Whatsapp Group 入面。

咁好自然,Cammy 唔通打完一場波就 Quit Group 咩,佢就開始加入同 Sam 一班朋友吹下水咁;去到後期,Sam 開始收到 Cammy 私底下短訊,雖然佢拍拖經驗少,但係都怕惹人誤會,唔係怕人鍾意自己,而係怕比人當做狗公,所以都係有一句沒一句咁樣同 Cammy 閒聊。

然後,過左兩星期,Cammy 打電話比 Sam,話「我好鍾意你,你可唔可以做我男朋友?」

Sam 嚇到即刻 Inbox 我,問「神婆點算?點拒絕?」

無錯,Sam 當下係即時想拒絕的,因為我都講左,仔仔心有所屬架,佢心目中已有女神架啦,加上「大佬呀見過一次咋,仲要係成班人打波呀,鍾意我乜春呀?我無錢又唔靚仔架!」。

面對突如其來嘅表白,阿 Sam 好慌,但係佢都知道「拖住人係唔好」,所以 Sam 淨係覆左 Cammy「Sorry 呀,我有鍾意嘅人架啦,多謝你好意」然後加十個跪地 Emoji。

原本,以為件事咁就告終,點知。

「你都無比過機會我。」Cammy 回覆,「你鍾意人地啫,咁你咪一路同我拍拖,一路試下追唔追到人囉,追唔到咪認真同我發展囉!」

Sam 望住個短訊,呆左唔識點覆;佢內心飄過一句「痴線架?」但係對手又唔好意思打出呢三個字。

於是,隔左幾個鐘,半夜三點左右,Sam 接到 Cammy 電話。

「早知我唔鬼聽,條女真係痴線架喎!」Sam 同我講起呢件事都仲係一臉驚訝,「我真係寧願一世打飛機都唔想要呢啲女仔做女朋友!」

寧願一世對自己雙手忠貞,都唔想同佢一齊嘅 Cammy,到底個電話講左啲乜?

Sam 聽電話,聽到 Cammy 喊緊。

「點解你唔比機會我?我都做到咁啦,我好差咩?」

Sam 原本想答「唔係差,係同你唔熟呀大佬」,但係 Cammy 無比機會佢講野,佢繼續梨花帶雨咁(亦都好 Chur 咁樣)同 Sam 講左以下呢一番說話。

「我話你知,我有情緒病,我唔食藥會成日想自殺;仲有呀,我個腎有事,我一定要日日食藥,如果唔係我隨時會有生命危險。如果你唔同我一齊,我就咩藥都唔食!」

講到呢度,Sam 望住我,我望住阿 Sam。我諗我個樣有少少滑稽,大概 O 嘴 O 到 2046 咁嘅樣吧?Sam 望住我笑左出聲。

「神婆,你都呆左呢?」

呆?我點止呆,簡直萬般說話在心頭,但係一時三刻,組織唔到,唔知第一句講咩先好。

得罪講句,喂阿姐你嘅健康關我屁事呀?你係我朋友、你係我條女我都話比面你吖?家下嚴格黎講,萍水相逢,你 Dry 你嘅事,你用死黎要脅一個人去同你一齊?手段 Low 唔 Low 啲呢?你唔愛惜生命係你嘅事,換個角度諗,你做到威逼利誘咁去要求一段愛情,你真係會覺得開心咩?

我諗,天下間無乜邊個人鍾意比人勉強、比人無理地 Chur。追求一個人,唔應該係咁架女,如果你對個個男仔都係咁嘅態度,你無可能搵到一個真心愛你嘅人架噃。

同埋,半夜打電話比人,擾人清夢,真心好差呀(重點)

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194031
Date: 2019-05-17 05:10:58
Generated at: 2019-07-17 05:32:03
Permalink: https://www.vjmedia.com.hk/articles/2019/05/17/194031/【塔羅個案】用健康、甚至以死相脅去叫一個人鍾