情深是怎樣煉成的?

 

 

曾經有個廣告話「三歲定八十」,係唔係真我就唔知啦~不過,十八歲前嘅種種經歷,足以影響佢嘅想法、心態、行動、甚至係精神健康。

咦?點解變左講啲咁學術性問題嘅?如果有睇我上一篇文章嘅讀者,應該記得我今次要講A先生嘅背景。無錯!因為呢位A先生都係小時「有啲經歷」嘅人。事先聲明,我有得到呢位A先生嘅同意嫁!因為唔好嘅經歷未必個個願意比人知。不過都比大家打定個底先,經歷未必係好大件事,但係就形成咗而家嘅A先生。

A先生由細到大都冇乜朋友,係學校係位邊緣人。不過佢性格又唔算孤僻嫁喎。不過因為家庭問題,比佢好多限制,甚至令佢冇乜朋友。點解咁講?當佢同成班同學出去自修室溫書,打電話同家人講聲,換來嘅係係電話比人屌一鑊,再加上佢即刻出黎,係半路攔截,再係成班同學面前屌多鑊再捉走佢。如果你係佢班同學,你驚唔驚?大部分人都係多一事不如少一事,少惹呢個人為妙。

當然仲有唔少事啦,我就唔講咁多啦。好彩嘅係佢出黎工作後,遇到嘅同事都唔錯,冇乜仆街。不過佢都係冇交心朋友,可能我會係其中一個。因為行業關係,同事女多男少,傾得嘅一定係八卦事。真係想談心?風險高過你炒孖展呀!呢頭講完,食完飯返黎可能已經全店知道,走黎「關心」你。

「誰人曾照顧過我的感受,待我溫柔,吻過我傷口?」冇人理佢感受,已經習以為常。不過亦因如此,佢自己會好照顧其他人感受,遇到個會關心下佢嘅人,佢一定會對佢更好。我覺得佢係想用「我先對你好,你再對返我好」嘅方式,去得到多啲關注。可惜現實嘅係「Who’s fucking care」。

難得佢遇到一個佢覺得可以交心嘅人,而且仲好中意添。果個人又會關心佢,A先生覺得開心過中六合彩頭獎呀!終於有一個人係值得佢用盡一切去愛。當然亦唔係一開始就成功啦,比人拒絕過好幾次,到最後終於可以一齊。我都好「登」佢開心。

之後佢變左另一個人咁,每日只想見到個女仔,腦海裡面只諗住點樣可以比驚喜個女仔。各種禮物,去搵唔同餐廳,甚至諗緊點可以令佢更幸福。之後發生咩事,大家可以睇返上一篇。

如果人生如戲,我好肯定直到而家為止佢都屬於一個悲劇,只能希望佢會有個Happy Ending。

A先生當然慘,但個女仔亦冇錯,大家都係追求自己幸福。只係A先生嘅傷口,至今似乎亦冇好轉過。用句歌詞黎形容,「被世界遺棄不可怕,喜歡你有時還可怕。」真係好適合佢。曾經係網上睇過一句,「成王之路總是孤獨的。」。若真如此,我寧願只做平凡人。「不必挑選我們成大器,當我兩個並無冒險的福氣。」只可惜如今的他,只剩自己。

 

(作者有話兒)拖左咁耐先出,唔好意思呀咁多位!下次講下A先生而家嘅諗法。大家如果有自己嘅意見、感受、甚至自己嘅經歷或故事,不妨係Facebook留言呀。我都好想知道大家嘅睇法。題外話,我自己都係讀者之一,除左會追神婆嘅塔羅個案之外,最近好中意睇柚希嘅文章,佢寫嘅我全部睇晒!唔知佢又會唔會睇到我寫嘅野呢。(粉絲mode)

 

作者:未亡人

一名廢青,冇目標冇夢想,行事全按心情。偶有迷失之時會尋求神婆指點。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194396
Date: 2019-05-25 04:40:21
Generated at: 2020-02-19 17:39:19
Permalink: https://www.vjmedia.com.hk/articles/2019/05/25/194396/情深是怎樣煉成的?