【塔羅個案】朋友中左抽獎請你去旅行,但轉個頭話要收返你錢,你嬲唔嬲?

文教 / 最新文章綜覽

 

發大財,好手氣。每個人身邊都總會有一兩個「歐洲人」,即係手氣或運氣好嘅朋友。

今次個案嘅主角 Zoe,係我一個非常相熟嘅客人,佢笑話「呢個故事你不如寫出黎比大家分享」,好,咁大家準備聽故仔啦。

Zoe 年紀輕輕已經喺工作上甚有表現,加上樂天性格,人緣極好。不過,朋友量多,唔代表個個都優質,Zoe 都有比人蝦嘅時候。

Zoe 有一個關係「算唔錯啦」嘅女性朋友,本身大家係舊時做義工識,姑且稱呢位朋友做 Sally。

Sally 有一日同 Zoe 講,話自己抽中左公司獎品,係旅遊套票,價值幾千蚊。佢當時嘅短訊係咁的。

「我抽中左獎!可以免費去旅行!你有無假?我地一齊去 Enjoy!」

Zoe 見此,替朋友開心之餘,二話不說向公司拎左 Annual Leave。必須補充嘅係,Zoe 家境不錯,自己亦有一定搵錢能力,隨時想飛就可以飛,銀包都好鬆動;所以佢絕對唔係貪小便宜嘅人。

佢問 Sally「啲錢點計呀?我請返你食飯當多謝你?」

「得啦,同你講呢啲咩,唔駛啦!」Sally 咁答。

結果,Zoe 興高采烈去到機場,Sally 劈頭第一句就係,「今次套票值咁多錢,你而家比返一半我,定返香港先計?」

Zoe 黑人問號,眉頭一揚。哦,原來係充大頭鬼假闊佬,之前問又話唔收,到最後咪又係扮無講過要收返自己錢。

Zoe 都係有啲傲氣嘅人,佢現場即刻 Payme 返 Sally,笑笑口咁話「好呀我都唔鍾意差人野。」

錢,比左;條氣,就唔順架喇。

「之前問又話唔駛,去到現場就叫我比返錢;喂又係佢話男朋友唔得閒所以想我陪佢,我特登拎假架!」Zoe 講起都仲躁躁地,「嗰一刻開始我都知個旅程唔會太開心。」

Zoe 到底都係重感情的,佢黎開牌問其實 Sally 到底係針對佢、大家無自己想像中咁 Friend,定係 Sally 份人一向都係咁,只係自己唔了解。

開出黎副牌,就見到其實 Sally 原本係想做闊佬,但係佢份人一向緊張數字,所以決定收返錢,咁自己手頭無咁緊。

「手頭無咁緊?講緊三千蚊咋喎⋯」

我不置可否,「每個人睇數字嘅價值都唔同,去到當地,你地食飯佢有無同你計埋啲零頭吖?」

Zoe 輕拍枱面,「你講起我就明。佢算到盡架。$143.5 嘅野,佢會收我 $150,但係自己就出 $140。」

我笑,「See。OK 呀我覺得,三千蚊了解朋友真面目,數口精,一定持家有道。」

Zoe 聽罷大笑,「總之我唔會再同呢個人去旅行,喺香港食飯都免了。」

去旅行好多時都易同朋友生磨擦,講錢又永遠傷感情。在座各位又有無類似經歷呢?

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

  • 【LEGO快訊】LEGO迷你兵團正式登場 by 阿九
    講左好耐嘅 LEGO 迷你兵團終於都喺紐約玩具展前席正式登場!暫時公佈嘅產品總共有 5 款咁多,而當中以 75 […]…
  • 【劏房生活實錄】連打飛機/捽碟都怕被鄰居聽到. . . . . . by 一百八十呎
    上次講過我同隔嚟屋只係一板之隔,夜晚瞓覺連人哋呼吸聲都會聽到。人哋屋企又有小朋友,可想而知,捽碟的話我一定要帶耳機。試過唔記得戴,一開就大大聲「澳門首家線上賭場上線啦」,嚇到我心都離一離,人哋唔知以為我沉迷毒海都唔好啦。…
  • 【引爆中國】(二):中國沒有不分裂的本錢 by 薰華
    上次講到葛劍雄《統一與分裂》提出,中共政治政確下嘅標準計,中國歷史上只係統一過81年,而依照傳統中國所講嘅統一嚟計,其實中國亦都只係統一過950年。咁即係話,無論你中意由夏后帝啟開始計、由成湯開始計、由周召共和開始計、由秦始皇開始計,定係由…
  • 【口罩知識】99% PFE 就等同 N95 口罩? by Tango Chan
    PFE(Particle Filtration Efficiency)則是顆粒過濾效率,以 3M 為例,他們會利用 0.1 μm 的微粒及 28 lpm 流速來測試外科手術口罩的過濾性能。而普遍來說,這項測試容許使用 0.1 – 5.0 μ…
  • 【引爆中國】(一):中國只係統一過81年? by 薰華
    「支爆」呢個term,筆者都聽咗好幾年,然而每次話支爆,結果都好似不了了之咁,直至今年武漢肺炎大爆發,有朋友就開始盤點下現時中共所面對嘅所有問題,發現係歷朝歷代滅亡前夕嘅事件嘅大集合。既然係咁,筆者亦都想講下到底歷代嘅統一同分裂,背後究竟係…
  • 【引爆中國】(三):統一之後…… by 薰華
    今日唔係想講秦漢之際喺中原發生嘅事,而係睇下喺我哋呢頭,嶺南一帶發生嘅事。…
歡迎讚好我們的facebook page,免費資訊源源送上。

文章資訊

ID: 194415
Date: 2019-05-25 17:43:47
Generated at: 2020-02-24 16:45:03
Permalink: https://www.vjmedia.com.hk/articles/2019/05/25/194415/【塔羅個案】朋友中左抽獎請你去旅行,但轉個頭