分開以後,係唔係一定要放低?

 

 

呢個問題,A先生曾經問過我。
而我亦冇正面回答,因為我睇得出,佢自己已經有答案。我反問佢:「咁你點睇?」
佢話:「當你真正愛一個人,又點會放低佢?」

不能不說,佢有時講野都有返啲智慧。我認同佢講嘅說話。網上好多留言、文章都會話,真正愛一個人,會放手比佢走,祝福佢得到更好,自己係背後睇到佢幸福就夠。我只能說,又有幾多人做到?甚至係唔係「人」可以做到嘅事?

點解我會咁講?人類唔多唔少都係自私嘅。你真係好愛一個人,你的確會想佢幸福,不過係喺你身邊嘅時候,你令到佢幸福。因為你知道,你一定會用盡全力比幸福佢,而其他人唔一定係認真愛個女仔。正正因為呢個原因,你唔會咁容易放佢走。一部分係你唔捨得,另一部分係因為你怕佢受傷害。特別係個女仔以前已經受過唔少傷,你更加想保護佢。而你知道,你自己一定唔會傷害佢。

真係做到放低嘅,我認為得兩種人。一種係已經超凡脫俗、五蘊皆空、看破紅塵果啲。目前我就未見過嘅。第二種就係,你已經唔再愛呢個人,咁你就會放低啦。可能有人會話:「我放低左,但係都會想佢好喎。點計先?」咁只係代表你唔討厭呢個人,唔代表你仲愛佢。

只要你一日仲愛呢個人,你就唔會放低佢。放工時間落雨,你會擔心佢會唔會淋雨,因為你知道佢唔中意帶遮。天氣凍返嘅時候,你會擔心佢會唔會凍親,因為你知道佢平時著得唔多衫,個底又寒。計返日子,你會因為佢唔舒服而擔心,因為你會記住佢幾時M到。見到佢最後上線時間係凌晨4點,你會擔心佢會唔會出左去飲酒,會唔會有咩意外,會心緒不寧。

有人可能會話,咁你放低佢咪得囉。
誓詞都有講,無論貧富貴賤、生老病死都唔會離開對方。正正象徵真愛永不分離,咁你真正愛一個人,又點會放低佢先?感情就應該認認真真,遇到一個你愛嘅就認真對待。感情唔係遊戲,唔係一種娛樂,更唔應該有「冇左就搵過個」嘅心態。

A先生話:「你問我掛唔掛住佢?一定掛住嫁。只係唔可以再輕易表達比佢知。我依然愛佢,會擔心佢。我亦會努力實現曾許下嘅誠諾。以前行街話過會買比佢嘅唇膏、生日話過會送嘅手袋、甚至話過儲錢買比佢嘅一卡鑽石,佢都會慢慢實現。只係,到時可能已經冇比佢嘅理由,但係我會照買!」正如梁靜茹果首會呼吸的痛咁講,「一個人完成我們的夢想」。

可能好多人會覺得佢蠢,我就好欣賞佢。起碼佢係真正愛一個人,唔係見一個愛一個。我寧願用蠢嘅方式去愛一個人,都唔要用聰明嘅方式去見一個愛一個。

呢個世界好大,有好多野可以玩,點解偏偏要玩一樣唔應該玩嘅感情?我就睇唔透啦。我只可以同A先生講聲:「加油!堅持你所想!呢樣係值得欣賞嘅事。」係呢個已經變質嘅世界,仲可以堅持一樣咁純潔嘅事,真係好叻嫁啦!「如果,全世界我也可以放棄,至少還有你,值得我去珍惜。」

我衷心希望,A先生可以有個Happy Ending。如果世上真係有因果報應,都好應該「報」返比佢啦。大家都一齊祝福佢啦~

大家係Facebook講下自己嘅睇法呀~我會睇嫁!
下次回覆大家嘅意見睇法。

 

作者:未亡人

一名廢青,冇目標冇夢想,行事全按心情。偶有迷失之時會尋求神婆指點。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194485
Date: 2019-05-27 18:03:33
Generated at: 2020-02-19 22:15:38
Permalink: https://www.vjmedia.com.hk/articles/2019/05/27/194485/分開以後,係唔係一定要放低?