【外賣仔日記】今次講一單另類送外賣:順phone 車的懷疑「假自僱」勞資糾紛

 

SF CAR FB 圖

 

著名速遞公司順豐旗下嘅即時送遞服務嘅「順phone車」(English:SF CAR),當中嘅即時送餐業務呢排發生咗好多事吖,重要加咗啲規距添,我哋今次就嚟講下。

 

首先同啲唔太知咩係「順phone車」嘅人解釋下先,佢啱啱開個陣係一個可以做即時搵到貨van 嘅平台嚟嘅,之後發展到去搵電單車/步兵去送一啲連鎖餐廳嘅外賣,同而家個幾間外賣平台唔同,「順phone車」只係負責攞食物送,而唔係外賣平台個隻,你響佢哋度嗌埋嘢食,即係如果你係顧客,你仍然都係搵番餐廳嗌嘢食,然後送食物嘅部份由「順phone車」負責。

我哋又講吓呢排「順phone車」究竟發生緊啲咩事啦,早前有師兄送緊外賣嘅時候俾人襲擊,然後俾人搶去準備用嚟找續嘅錢。

本來要求多嘅「順phone車」外賣送遞,而家開始好多師兄/師姐嘈,本身有咩嘅問題都開始講,今次主要係嚟講下良久而來發生嘅問題。

加入「順phone車」嘅師兄/師姐,本身係以一個外判商嘅形式去加入「順phone車」做嘢嘅,咁即係自僱,而唔係以一個員工嘅身份響「順phone車」到送外賣,但係如果你要獲得一個有保證每小時最少收入嘅工作時間(下稱「包鐘更」),你一定要跟從不同嘅規定,來釐定一個分數,然後再用呢個方法去決定報更嘅優先次序(更份係先到先得,所以有得優先報更,係會獲得更多更份),但係個計分方法其實好容易就會俾人扣分,導致你能夠獲得工作嘅時間少咗。而會令到你被扣分嘅事項,全部都係一啲送遞工作上嘅要求嚟啲規則全部都寫晒響「順phone車」工作指引入面(以下簡稱工作指引),同埋如果違反工作指引入面同一條嘅規則多個一次,即係兩次或以上,會俾人暫停工作7日㗎,如果不斷違反,唔知會唔會俾人永久停止工作呢?我睇番「順phone 車」的工作指引,其實某啲規則我覺得係會有可能構成假自僱。

 

講下工作時間,自僱人士本身係可以自行決定你自己嘅工作時間,但係「順phone車」事實我睇到並非如此。

你可能會問,自己去報更㗎喎,時間自己提出,點樣話唔係呢,有師兄指出,如果你報咗更返有包鐘嘅更,你之後話請假,就算「順phone車」知道咗,無論任何原因都會被視作無故缺席。然後又扣分,影響報更嘅優先次序,我更發現請假請得多都會扣分喎, 同埋關於請假而扣分嘅規則係都有唔少喎。我想問,你唔係冇通知下no show 喎,而家響任何情況下請假都會有後果,真係自行決定你自己嘅工作時間?

仲有,咁而家自僱吖嘛,我但係我請假有後果,咁即係我搵替工就ok 啦。唔好意思喎,根據「順phone 車」的工作指引7.1,你係唔可以搵替工㗎,違例者係會之後7日不能工作㗎,當然啦,仲有扣分。

 

工作指引7.1

 

真係自僱?

 

另外,「順phone車」開工,係講明強制速遞員要穿著一件「保護衣」,「順phone車」工作指引寫嘅指引係話要穿著一件「保護衣」,如果唔著係又會扣分,影響報更嘅優先次序,重要嘅係,「順phone車」響同送遞員溝通嘅whatsapp 對話入面,叫同事要著「制服」,係「制服」而唔係用「保護衣」呢個字眼,咦?點解會有制服嘅?同埋就算當佢真係「保護衣」,咁點解會要求送遞員一定要著嘅?依家工作所需器材你提供喎。
仲有你件「制服」係要響你入職嘅時候俾100蚊按金攞架喎,件保護衣擁有權係邊個架?

 

都係個句,真係自僱?

 

以下為「順phone車」同送餐員溫馨提示要著制服嘅訊息

 

仲有,根據工作指引4.1,你係要著「制服」㗎喎,咦?制服?乜唔係保護衣咩?同埋唔著又扣分

 

工作指引4.1

 

到保溫袋,開工就強制要用保溫袋嘅,咁但係你登記入去「順phone車」工作嘅時候,你係要強制攞一個「順phone車」保溫袋,而且係要俾100蚊按金(唔係制服個$100 阿,係另外嘅$100 按金),咦?點解工作所需器材你提供嘅?咁你可能會問,咁我自己響鄰國某網站到買個返嚟開工得唔得呀?唔好意思,根據工作指引3.1,你係要使用「順phone車」專用嘅保溫袋開工嘅,唔用?扣分囉。嘩~?而家自僱喎,點解工作所需器材你提供嘅?重要係個袋要俾按金攞架喎,姐係財產擁有權係你喎。

 

都係個句,真係自僱?

 

工作指引3.1

 

同埋,呢排開始要求送餐員送餐前自拍著住制服嘅相,同埋「順phone車」保溫袋,whatsapp,send返俾「順phone車」員工作記錄。咩事呀?自僱喎,我用咩工具送關你咩事?我無保溫袋你罰我都話吖。「順phone車」保溫袋?制服?

 

都係個句,真係自僱?

 

 

我而家嚴正強烈溫馨提示你順豐,你想嘗試玩嘢嘅話呢,我就會積極協助咁多位師兄/師姐追返多年來咁嘅員工福利,勞工保險,執正418同你玩。

 

 

專題:【外賣仔日記】

 

 

作者:外賣仔

外賣仔

閱讀後覺得好,請多多讚好及分享~:)

其他熱門文章

  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 大埔浸信會借 Nick Vujicic 籌款事件補充 by Do Chan
    聚會的定位是「佈道暨擴堂籌款」聚會,這一點是令很多人勃然大怒的。我猜想,其實主辦方並不是想非信徒買票聽福音,他們的目標其實是教會內的富貴會友,他們買票捐錢給教會,教會還以阿 Nick 親身講見證,本意是想雙贏,但結果卻釀成公關大災難。敝教有…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 194509
Date: 2019-05-28 06:21:09
Generated at: 2022-08-09 05:57:04
Permalink: https://www.vjmedia.com.hk/articles/2019/05/28/194509/【外賣仔日記】今次講一單另類送外賣:順phone-車的