冇日本免簽假新聞先引到香港人講政治?

政治 / 最新文章綜覽

 

自從歐盟向香港發出外交照會,加上港府突然宴請各駐港官員午宴去解釋逃犯條例有幾咁「德政」,香港人更關心嘅依然係台幣跌返落近年低水。不過最近突然間好多香港人都擔驚受怕,因為有人傳日本可能會取消香港嘅免簽待遇,而依點對香港人嚟講係慘過一切——雖然好明顯係假消息(暫時啦,香港咁玩火法咩都有可能),但總算證明到香港人針拮到肉係知痛嘅,只係喺樓價人工生活壓力下佢地都仲忍到扮到瞓,直到可能影響到冇得即飛日本佢地先起身了解下個香港咩事。

冇人講過唔企出嚟捍衛香港私地遲早玩完咩?唔係啊,由一開始嘅反23條、反國教、雨傘運動、魚蛋革命,每次都有人企出嚟向所有人講香港人再唔企出嚟就玩完,遲下你想企都冇機會。但香港人普遍反應係點?返工嘅話你阻路、有錢嘅話你阻住香港、有樓嘅話你阻佢發達,一班企出嚟保護香港嘅人就被冠上搞搞震同廢青之名。當日依班人以為佢地可以置身事外,以為香港再亂都唔會搞到佢地層樓同身家,香港有幾唔屬於香港人佢地都可以話飛就飛。好嘞,而家終於燒到依班人身上,一條逃犯條例搞到連民建聯班撐中人士都要賣樓套現準備隨時閃人,一個漠視民意不特止連全世界都反對下依然要硬推嘅香港特首搞到香港玩完嘅日子由不遠一眨眼就變成好快,而家依班人先識驚?先希望有人做嘢去阻止?會唔會遲啲啊?

香港人太醒目,凡事都想拖到最後一刻。由細細個最後一刻先做暑期功課到返工最後一刻先交Report,而家連外交照會都出埋,伴隨住日本會唔會冇咗免簽,美元會唔會脫勾等因素先開始去驚去擔心,先準備用遊行作抗爭嘅開始?當年最有力嘅雨傘運動搞到咁都唔得啊,而家依個完全唔理民意嘅特首你諗住行幾條街就會唔搞?仲想曾經比你地鬧過笑過嘅人去為咗你地嘅錢途幫手抗爭?有幾多個義士為香港而坐監,又有幾多個一直扮瞓嘅香港人當中有份笑佢地終於坐監,話佢地抵死?

起初他們(德國納粹黨)追殺共產主義者,
因為我不是共產主義者,我不說話;

接著他們追殺猶太人,
因為我不是猶太人,我不說話;

後來他們追殺工會成員,
因為我不是工會成員,我繼續不說話;

此後他們追殺天主教徒,
因為我不是天主教徒,我還是不說話;

最後,他們奔向我來,
再也沒有人站起來為我說話了。

二戰就有嘅教訓,香港人都係學唔識。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194560
Date: 2019-05-29 05:38:15
Generated at: 2020-02-29 12:53:11
Permalink: https://www.vjmedia.com.hk/articles/2019/05/29/194560/冇日本免簽假新聞先引到香港人講政治?