【送中條例】中國香港人唔見棺材唔流眼淚

 

 

引渡條例修訂一事,就好明顯睇得出一件事——中國香港人唔見棺材唔流眼淚。

不過搞清楚,我唔係話緊支持修例/唔知發生咩事嘅人,係話緊你地呀泛民及其支持者!

由回歸開始,港共政權做過幾多野呀?廿三條、東北發展、國民教育、港視發牌、政改、機場三跑、DQ議員,到呢家送中條例,你地仲覺到一國兩制係可行、要求政府尊重一國兩制?一國兩制經過呢十九年嘅洗禮已經名存實亡,證明左一國兩制係唔可行,泛民及其支持者仲擁護一國兩制,就係幫凶。

到今時今日,泛民將六九遊行喻為終局一戰、希望各位能夠出黎遊行撤回送中條例。我可以講,點解香港無民主,就係泛民領導運動、為運動設限、令民眾目光短淺。當反對派輿論仲充斥住「點點點點就會令到邊個邊個點點點,逼中共徹回方案。」就係呢種心態先會令中共肆無忌憚。原來反對派掌握民意手執大義,都只會用黎撤回方案,唔會逼政府落台/尋求獨立嘅。千祈唔好比法國人知,一定笑死佢地。

博弈論。中共贏左你地死全家、輸左頂多咪撤囉。姐係中共一定會贏,因為佢根本輸嘅機會係零呀!今次輸左咪下次再嚟囉。政改失敗咪唔好改囉。咁佢地點會怕你地班人反對呀?相反,泛民只係消極防守,贏左又無獎勵、呢家party搞手只求打過和呀?輸左,咪真係輸囉。泛民一次又一次帶領群眾玩呢場唔會贏嘅遊戲,先係搞散香港民主運動嘅主因。

咁點解大家仲會跟住泛民玩呢個唔會贏嘅遊戲?講到尾就係唔見棺材唔流眼淚,唔燒到埋黎就唔關我事。大家覺得呢家仲係有險可守、咁不如維持現狀、最緊要唔好激嬲共產黨,只要跟泛民打好守勢波,大家繼續有工返有錢賺就好。咁又唔係唔得嘅,你地鍾意打防守,守到2047先統一嘅話,我都唔方便指責你地。不過提醒返,泛民係無否決權,中共要過咩法例都係可以合法過到。但係每次有人提出國王其實無著衫嘅時候,就會比泛民話鬼、反化群眾。

DQ事件,記唔記得泛民點講?佢地搞事在先激嬲共產黨,佢地抵死!到DQ自決派呢?燒到自己,未話中共DQ政治打壓囉。泛民主派議會嘅完美表演,正正詮釋左其支持者見棺材流眼淚。

要打破呢班中國香港人嘅自欺欺人,好簡單。比個棺材佢地睇,佢地就會乖乖行動。今次送中條例殺到埋身,泛民覺得大鑊,終於出盡全力反對(表演做個對比,就知道佢地平時根本無心反對),但可惜都係「中國香港人」,只係要撤回方案玩返一國兩制。咁如果送中例送過埋,拉咁幾個「中國香港人」上去,佢地會唔會夠唔夠膽做返香港人,反抗中國呢?

 

作者:緋色雪夜

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194684
Date: 2019-06-01 23:32:31
Generated at: 2020-02-26 18:20:55
Permalink: https://www.vjmedia.com.hk/articles/2019/06/01/194684/【送中條例】中國香港人唔見棺材唔流眼淚