【逃犯條例】港豬要點教仔女好?

 

 

事源最近【逃犯條例】炒得熱烘烘,不過真心唔覺得,對我呢d 8号波一落就冒住生命危險都即刻死返工既港豬來講,逃犯條例係有幾得人驚丫!阻到我返工咩!所以你話我知,究竟,港豬驚返唔到工多D,定抑或逃犯條例多D?

二來,我呢D港豬,十個有九個都同王菀之一樣咁討厭政治,第十個就打緊政府工同中資工,要識入戲靠邊站,一個唔覺意係 Facebook like左 輔仁,咁就仆街囉,漠講話升職,有D中資直頭借頭借路叫你執包袱走添呀!其實我去輔仁睇 J圖喞,你話政治係咪真係討厭丫!

所以,話知你話我政治無知好,抑或係最無知既無知都好啦,逃犯條例?!唔會攪我呢D只會返工既港豬既!

咁有人問: 有冇返大陸玩呀? 我係一名宅男,唔好話返大陸玩呀,就連出街都差D有障碍,但我就好中意上淘宝,對我呢D宅男來講,有咩野好得過唔洗出街又買到野丫!有個老友就嚇9我話,咁就死得勒,就算我唔返大6,逃犯條例一樣可以挫我協阻經濟犯罪云云!

嘩!我屌丫,要唔要交吓戲話好驚呢?!好似我D死窮L,雖然有幸父幹下有層樓唧,但要搞套大龍鳳黎搵我D錢?前面有咁多富豪,高官,商人,白手套,官二代,富二代,偽人,仲有書店老闆啦,泛民,同在港加拿大人!

唔好問我點解係加拿大人,而唔係美國人,政治既野,我識條鐵咩!總之個 List,由西環開始排,排到小西湾都未到我啦,吓嘩!

所以逃犯條例,我真係未驚過!不過只係到琴日為止 。。。

因為我將會做爸爸!。。。。係!你冇聽錯,事實証明宅男其實都可以識到女朋友,兼結婚生仔的。係。。。。係偽毒,但偽毒都係毒,不過今日我唔係想講我有幾毒,同點樣可以又宅,又毒,但又識到女!有機會係可以同大家分享下 。

當我聽到我女朋友同我講話我好快做人爸爸,我個心個刻真係離一離,若果你跟我講,呢個係值得高興既事?咁就好似CCTVB咁,到今時今日既處境劇一樣【脫離現實】,如果生細路真係咁高興,香港2018年,個生育率就唔會全球224個地區上排尾 4 啦!啊羅局長仲話,若只計算本土香港人【即只計算有三粒星既港媽所生既BB 」極有可能係包尾添!

好了,驚還驚,始終都要面對既!首先要唔要搬去個好d既校區呀,搵間好d既學校,呢個相信每個家長都好緊張既!以下分享一個真實對話 :

老友A 係Whatsapp 群组 post 左佢讀緊小二既小朋友比老師用紅筆圈左答錯既功課,求正確答案。TLDR,長話短說,問題根本係 「條問題出錯 」!老師又冇 Heart,只跟答案纸改簿,所以係點答都錯,除非你買到套答案紙照抄啦,個世界仲未有家長癲到咁吓嘩?!點都好,個問題正式黎勒!老友A話唔止一次係咁,問要唔要跟老師講!朋友B 即刻話千其唔好?!

朋友B 佢雲海上身咁話呢d題目係有目的既!係比D紅底老師抽出有批判思考的小朋友再【教育】,同時又可以令唔出聲既小朋友習慣權威出錯而默不作聲。

三來,若你去指正個老師,就中正個紅底老師下懷!佢會開始針對住你個小朋友,寒嬋效應下,無論係其他小朋友,定抑或其他家長見到,都學會投鼠忌器,忍得就忍。

嘩嘩嘩!你會話有冇咁恐佈?比着以前我細個既年代,我會叫朋友B 聽少D雲海,但今時今日去到連地鐵都會撞車,學校報警拉自已學生都唔係一單半單,香港就算再有荒謬既事發生,我相信香港人已經唔覺得有幾出奇,最多上兩日頭條,第三日仲講大家都厭你悶,仲要開始懷疑你係咪講政治,即時彈開添呀!

呢刻,真係越諗越煩,學校都搞成咁,問朋友邊度移民好,等個小朋友有個正常D既社會環境成長,朋友C話洗唔洗驚成咁呀?!叫個細路唔出聲咪得囉!

o岩喎!不過我唔知道我D仔女第日會唔會變到黃之锋,梁天琦,陳浩天,又或者周庭咁,咁有批判思考,又肯衝出黎既話,會出事個喎!

就係咁,我開始諗逃犯條例關唔關我D細路事!

但大部份港豬同我一樣,相信條例通唔通過,都係無能為力既事;所以,要有兩手準備!

Plan A:
繼續努力工作再工作,係佢有批判思考,同被尋釁滋事前,就成功移民,成為贏家!
不過身為假中產,就算賣左層樓,移民去低門檻既台灣都唔算係易事!係呢一刻真係好想班泛民頂住條逃犯條例,咁D富豪就唔會咁快套現,白手套D錢仲會黎幫手繼續頂住個市到2047!咁,大家都可以趁2047之前,齊齊搵錢,送仔女去外國讀書,然後先係最、最、最後一刻逃離呢個唔知幾時會拉9你的地方!

Plan B:
這個亦都係大部份無能力移民既港豬唯一的選擇!
就係不停替自己小朋友洗腦,叫佢地愛國,愛黨再愛黨!深信美帝忘我之心不死,成為另一個最憎阻人返工的港豬!

喂,喂,喂!又話港豬唔講政治?!其實經過雨傘洗禮,魚革,DQ後,身為港豬,當然要已識時務唔講 「不正確 」政治,【政治正確】冇問題既!你唔係週不時聽到你身邊D港豬開口埋口都話【一日最衰係佔中】咩 、【 最衰D靚仔搞搞震】咩 、一邊載哂頭盔話自已唔識,一邊又話犯左法就緊係要引渡啦,咁咁咁 。。。

所以,其實開始有D明白,特區政府的國民教育呀,國歌法呀,加強母語普通話教學,搞大灣區咁,真心係為今日既香港小朋友好,去到2047,佢地長大,同依家D大陸人冇分別,思想,文化完全融入,就唔會咁易比D香港公安拉左去!

正所謂 教育要從細做起,尤其洗腦教育,你試下去D100,謎米,林忌既 youtube channel 見識下D五毛評論,你就明白中國式邏輯有幾根深柢固!越遲洗,就越難洗架勒,到2047,佢地先習慣唔到一國一制,咪仲死?!睇下大陸D維權人仕呀,新疆既集中營呀,到時有個香港集中營又有幾奇,打死就話病死,被自殺咁,最好既下場既,應該係做個政冶難民 。

做父母既,要點教先好?我真係仲未識得答 。

不過,Plan A,Plan B 都好, 都唔係咩新鮮野,大陸人乜唔係都一直做緊呢兩樣野咩?!

至於有冇 Plan C?應該點講好呢 ~

成日聽到D人話咩香港最黑暗的一天,香港最黑暗的一天唔係廿年前已經 SET 好左係 2047 咩?!唔係咁,我洗Q檐心D仔女會唔會適應唔到呀?

依家D所謂泛民議員冇一個夠膽提香港 2047 會點, 點解呀?點解既?

因為 2047只得一個選項, 就係一國一制!你一提第二個選項,就可以入你違反基本法,就可以DQ 你!到時連議員都冇得做呀!

2047?Who cares!佢地行緊 Plan A 啦,仲邊有 Plan C 呀!

除非美帝可以收服共產黨啦 。。。

 

作者:水巷手蜀

唔好問我點解係手蜀,唔係犬蜀 。唔比人講,就越要講 。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194703
Date: 2019-06-02 05:38:01
Generated at: 2020-08-15 09:57:07
Permalink: https://www.vjmedia.com.hk/articles/2019/06/02/194703/【逃犯條例】港豬要點教仔女好?