招聘會遊記

 

一到咗轉工旺季,坊間都會有好多唔同嘅招聘會,一啲主辦機構會租用地場,一手包辦埋推廣同其他嘅安排,然後用一個全包價,俾其他機構租用場地入面其中一個檔位,而公司就只需要派個人,帶埋佢哋自己公司嘅宣傳單張、申請表格、紀念品同埋展品(通常就 Poster、易拉架哩類大件夾抵食嘅搶眼野)就得。

哩啲招聘會作用大唔大就見仁見智,但有啲公司就規定每季要做幾多次招聘會,最低限度就話俾人知,HR 有落力搵人,唔好招人話柄,俾到位人哋入。

話說小編公司幾個禮拜前都去咗一個招聘會擺檔,地點係一個室內運動場,當日一共有三十幾間公司參加哩個盛會。今次招聘會人流唔算特別多,不過開始咗唔夠 5 分鐘,有位中年男士走埋黎問……

中年男士:「你哋有無野啱我做?」

小編:「請問你做開邊行?」

中年男士:「炒下孖展呀、倫敦金……」

小編:「……」(小編望一望自己啱啱貼好嘅 Poster 同拉起嘅易拉架)

無野丫,明明貼得好地地,係寫住請侍應、廚師、洗碗同事,雖然可能哩幾個職位都啱哩位中年男士做,但真係唔好意思,公司應該未必夠錢請你。又或者,哩位中年男士可能搵夠咗錢,唔志在份人工,純粹想體驗下生活……(註:每間公司嘅招聘職位都刊登咗喺場刊,易拉架同埋每個攤位上面。)

又過咗幾分鐘,有幾位年約 60 幾歲嘅女士走埋黎:「請問有咩工作適位啱啱畢業,無咩工作經驗嘅人架?最好唔駛開 OT,時間穩定……我幫個仔問架!」有個廿四孝媽媽真係羨慕死人,但除非你真係已經返緊份工唔得閒,要駛自己媽媽過黎幫手問,否則小編都係再三強調,搵工係唔可以假手於人,要親力親為。

10 分鐘後,有個後生女走埋黎問:「你哋哩到有咩工?」

小編:「我哋請緊侍應、廚師、洗碗同事……」(又黎?)

小編講都未講完,個後生女就即刻露出一副鄙視嘅眼神,一粒聲都唔出就走咗。其實唔啱唔緊要,講聲都好丫,話哂禮貌喺日常生活都係好重要,唔止搵工。

正當小編開始有啲無奈之際,又有一個後生長髮男。第一句就已經當頭棒喝同小編講:「我唔係想搵工,你可唔可以俾張 Coupon 我去換禮物?」

噢!原來係黎換禮物,小編有乜所謂,都係大會提供,咪俾佢囉。(註:大會為咗吸引求職者申請職位,每次申請一個職位,間公司就會派張 Coupon 俾個求職者,集齊 5 個就可以換禮物)不過隔咗一陣,小編隱約聽到個後生長髮男心儀嘅禮物已經換哂。換唔到心儀嘅禮物,佢喺會場擾攘咗一輪,最後拂袖而去。

之後大約半個鐘都係拍烏蠅,腦細落 Order 話唔可以等運到,叫小編周圍去派下公司預備嘅紀念品(今次係膠 File,入面夾住公司嘅招聘單張),吸引人望下公司個檔。小編唯有周圍叫人攞份禮物同資料睇下(好似派傳單咁)。有好多人攞咗份贈品之後,就用0.0001 秒嘅速度彈開,好似小編有傳染病咁(雖然小編唔係明星,但最少都乾淨企理丫)。仲有唔少人「口裡說好,身體卻很誠實」,小編叫佢哋拎份禮物,佢哋把口就話好,但係完全無減慢腳步,仲加速向前行,完完全全經過咗個檔口。咁頭先你又答好?!係嘅,都係小編唔啱,人哋有需要就自動會搵你架啦,做乜要撩人姐。

返到個位諗住休息下,有幾個年輕人行埋黎,小編諗住睇下佢哋有咩問題,可以幫手解答下。點知小編重複問咗幾次,佢哋都好似聽唔到,不斷望住小編身後嘅公司資料,連望都唔想望下小編。小編覺得嗰下同空氣講緊野……

哩幾日招聘會,仲發現咗兩樣幾特別嘅野。其中一樣係小編發現有幾個求職者,每日都會黎招聘會,由開場行到收場。其實得嗰三十幾間公司,連續幾日行足 5 至 6 個鐘,有機會連公司背景都背得出。仲有個別求職者,連續幾日都會停留喺小編公司個檔口,然後每日問重複嘅問題(例如:你哋請咩職位?有咩要求?請唔請 Part time?有咩福利?)第一日問完,第二日又黎過?係你唔記得,定係小編認錯人?!

仲有就係當在場求職者好落力搵緊工,小編發現喺場邊嘅坐位上,有唔少人坐喺到瞓覺、睇報紙、玩電話……哩個係公開活動,大家都可以入黎。黎哩到消磨下時間係幾爽嘅,有免費冷氣,又唔駛消費,鍾意一坐坐足幾個鐘都仲得。睇黎小編老咗退休之後,都可以考慮下黎哩啲招聘會坐下,至少舒服過去公園同啲公公婆婆爭。

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194852
Date: 2019-06-03 04:51:53
Generated at: 2020-10-24 11:20:12
Permalink: https://www.vjmedia.com.hk/articles/2019/06/03/194852/招聘會遊記