【塔羅個案】去見工,成身煙味或者過濃香水味,真係唔係咁好

文教 / 最新文章綜覽

 

五月尾六月,係唔少應屆大學畢業生出黎搵工嘅日子。唔理你邊間學校出黎,除非你係啲所謂神科,晨早已經搵定啲銀行大 Firm 律師樓啦;不然,普通科目想搵政府工或者一般寫字樓工作嘅,新鮮人,見工太高姿態,真係唔係咁好。

我手頭上做 HR 或者 Headhunter 嘅客人都甚多,有時同佢地閒聊講開,求職人士,有時一行入房已經令佢地覺得可以彈鐘,當中比較年輕嘅求職者,好多時係比人彈鐘都唔知衰乜。

例如,頭髮顏色。Gel 甲唔代表品行不良,染金毛唔代表爛仔,有紋身唔代表你學壞。不過,你去見一啲比較傳統嘅公司,例如政府工、銀行工,外表太有個性嘅話,人地好少會覺得「嘩呢個後生好有特色,好有個人想法呀」而對你加分,相反,大部分公司會傾向認為「嗯呢個新人會唔會好唔肯聽教?」或者「呢個人好似好難 Handle」而暗啞底喺你份履歷表上面打 X 。

仲有一樣係好多年輕人都好似留意唔到,就係氣味。食煙唔緊要,你有鍾意嘅香水都唔緊要,但係氣味嘅野好個人,煙味我諗應該就算係吸煙人士自己都唔會鍾意架啦,但係香水味都唔係個個啱。

試過有年輕人黎問搵工,佢想見嘅一間傳統大公司,但係 Phone Interview 過左,一見到 HR 就比人彈鐘,佢想知自己衰乜;而佢一行入我舖頭,我就聞到好濃重煙味,好似搵尼古丁焦油醃過咁大陣味,我已經不禁嘆一口氣。

開牌出黎,其實佢條件的確符合份工,HR 之所以彈佢鐘,係因為「私人情感唔鍾意」。係嘅,搵工見工,除左經驗,仲有少少運氣,例如合唔合對家眼緣;不過,我都忍唔住問佢一句。

「見工前有無好緊張,喺人地公司樓下食過煙?」
年輕人一呆,「你點知?」佢有少少尷尬,「我好大陣味咩?」

我點點頭,「其實你本人可能唔覺,但係外人其實會聞得好清楚。你頭先上黎開牌之前,都喺附近食過煙吧?」

食煙係個人習慣,呢篇文章我唔係要同大家講咩健唔健康嘅話題。我有一個相熟嘅 HR 客人,任職香港某著名大公司,佢都同我講過,好多同事都食煙,好多老細都食煙,無野的。但係,黎見工之前,忍一忍,有幾難?

至於香水味,又或者係古龍水味,唔係話要挑戰眾多男女挑選香氣嘅品味,但係,舉個例,CHANEL N°5 香水,非常出名,鍾意佢嘅會好鍾意,唔鍾意嘅會真係一聞到就皺眉頭。HR 客人又補充,點解噴香水有時會扣分?「有無諗過或者見你嘅同事或者阿姐,係有鼻敏感?」

回想我當年仲係打工嘅日子,每次見工,我都化妝化到最淡,頭髮梳直,連袋都拎個最平實低調嘅袋。我唔知我呢一套係唔係已經過左氣,或者而家呢個 Generation 見文職工作可以見到好 Chill;不過惟獨係氣味呢一環,我喺啲 HR 客人口中聽過好多次,所以寫下呢篇文章。

無論係剛剛拎完公司 Bonus 嘅朋友,抑或大學畢業剛剛準備投身社會搵緊工嘅年輕人,見工,多多少少,還是有地方需要注意的。例如你去見政府工,你染到個頭爆紅,真係難啲會請你的;又例如你去見 Junior 文職 Post,就已經花枝招戰,全身行過勁過你見個阿姐嘅話,亦都唔會對你有分加的。

最近好多大學生黎問搵工,無論係事業方向,或者幾時搵到工,都有。喺學校裡面你可以生活得好有個性,我當年都係(唔准問!);但出黎面對社會了,見工呢一關,始終有啲地方係需要留意的。

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194901
Date: 2019-06-04 18:00:34
Generated at: 2019-06-19 17:58:07
Permalink: https://www.vjmedia.com.hk/articles/2019/06/04/194901/【塔羅個案】去見工,成身煙味或者過濃香水味,