唔該決定好先黎簽約

 

一般黎講,當你 Accept 咗一間公司嘅 Offer 之後,新公司嘅 HR 就會同你擇返個日子上佢到簽埋份合約,然後先再照原定嘅日子返工。雖然唔一定間間公司都係咁,因為有啲公司會厭麻煩,直接喺返工嗰日先簽,但小編更加相信絕大部分嘅人都應該唔會好似哩位靚女咁……

哩位靚女 Q 小姐都幾後生下,喺電話聽完小編講公司 Offer 嘅 Package(包括人工、福利、返工時間等等),就好爽快咁一口答應接受小編公司嘅 Offer。於是小編就約佢第二日下晝上黎公司簽埋張賣身契。

第二日 Q 小姐按照約定時間黎公司,小編安排咗喺其中一間會議室同佢簽約,咁循例簽之前小編都再重複多次個 Package(其實同前一日喺電話上講嘅一樣),講解完一次之後,小編再問多次 Q 小姐有無唔清楚嘅地方,或者有無其他問題。點知哩位小姐一直起勢咁望住眼前嘅合約,郁都唔郁,就咁過咗 30 秒……

小編頂唔順 Dead air太耐,唯有「溫馨提示」下佢:「其實係咪有咩唔明白嘅地方?有嘅話可以隨便問。」

Q小姐:「其實我都唔知簽唔簽好,我仲未決定好……」

(「Woo ~ 小蟹柳」,小編仲以為你已經決定好,所以尋日先喺電話到答應得咁爽快……當然哩句梗係無講出口,畢竟大家都有選擇嘅權利。)

小編唯有話:「或者你可以返屋企再慢慢諗清楚?中途如果諗到有咩問題想問,都可以聯絡我哋。幾日後如果你決定接受個 Offer,我哋可以再約個時間簽約。」

「我唔想走住,我上得黎就要今日解決哩件事,我要決定好做唔做先走!」 Q 小姐好有決心咁講。

小編:「咁……或者你可以考慮下先,我 20 分鐘後再返黎。」小編心諗,都係借間房俾佢用 20 分鐘去考慮下自己哩個階段,無問題啦掛。

如是者,20 分鐘過去……

小編:「決定好未?」眼見 Q 小姐搖搖頭……

小編唯有再問:「定係你需要多啲時間?」

Q 小姐:「幾多時間我都決定唔到!」

……

(不如我幫你決定,依家我哋唔請你!……可惜小編話唔到事)

小編:「不如你講出黎,睇下幫唔幫到你?」

Q 小姐:「其實可唔可以唔返咁長時間? 9 至 6 對我黎講太長……」

(其實對小編黎講都有啲長……)

小編:「一般嘅全職工作都係每日工作差唔多 9 個鐘,如果有特別原因唔可以返咁長嘅話,或者可以選擇下兼職工作。」

Q 小姐:「兼職太少人工,其實我覺得依家哩個人工返 9 至 3 最岩!」

(Woo ~ 都話你小蟹柳啦,原來講咁耐,係講緊小編公司出太低人工黎請你。當然,小編都想返 9 至 3,不過有哩個人工,又返 9 至 3 嘅話,小編都第一時間走咗去做啦!)

小編:「哩樣暫時安排唔到,有無其他問題?」

Q 小姐:「點解要返 5 日呢?我頂唔順,有無 4 日嘅工?(指一個禮拜返 4 日)」

(小編發緊夢都想……但 5 日都已經好過有啲要返 6 日。)

小編:「全公司嘅全職員工都係要一個禮拜返 5 – 6 日工。」

Q 小姐:「仲有其實我都唔知我阿爸阿媽想唔想我做哩份工!」

……

(小編真係幫你唔到……雖然小編唔知你爸爸媽媽想唔想你做哩份工,但小編就一定唔想你做。)

接唔接受一份工作,諗清楚係好事,但你最好都係返屋企自己慢慢諗、靜靜地諗,唔駛浪費閣下嘅時間同金錢黎我哋公司先諗,雖然有冷氣俾你歎下。如果有野唔明白,透過電話就可以問到。如果 HR 打黎同你講 Offer,而你又一時間決定唔到,可以要求多少少時間去考慮下,然後喺預定嘅時間內覆返對方就可以了。

仲有,如果有一個禮拜返 4 日,而每日返 6 粒鐘嘅「全職工作」,麻煩請通知小編……

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194940
Date: 2019-06-06 05:12:56
Generated at: 2019-08-25 18:31:49
Permalink: https://www.vjmedia.com.hk/articles/2019/06/06/194940/唔該決定好先黎簽約