少婦胸接小強,大驚變潑婦喪投訴鄰居污糟養曱甴

 

黑色星期五嘅早會,老細例牌問我哋有無問題…….

我:「是咁的,係關於18F單位少婦投訴隔離18E 大叔嘅單位有小強同臭味。噚日少婦走落嚟同天才同事投訴,但係佢無同我講返。係聽保安叔叔講少婦要我上門搵佢,聽佢投訴先知道。」(遲啲講吓天才同事,佢做嘢幾咁天才!)

老細皺咗吓眉,然後示意叫我繼續。

我:「據保安叔叔講,依嗰單位自從佢老豆、老母走咗之後,就開始傳出臭味同有小強群出沒!嗰日,我上門聽少婦投訴,佢話見住小強由門鐘「躝吓、躝吓」然後跌落心口,嚇到佢9衝去浴室倒晒成枝消毒藥水落身沖涼,再9衝落嚟秒變潑婦投訴。」

賤嘴同事:「少婦,係唔係用人間凶器,「波罅」夾到小強窒息「屎咗」?」

我:「停機坪嚟㗎!俾兩件衫罅夾到就真。」

卸膊主任:「大叔太dry嗱,你溝咗大叔佢,等無咁dry,就自然唔會投訴。」

老細:「你介紹個人俾佢,男又好女又好,夾到嘅就會幫佢打理屋企,咁就唔會臭、有小強。再唔係你上,你個自認廢青就少奮鬥十年,有樓揸手。仲有,你有無入過大叔屋企睇吓環境呀?」(心暗:你推我去屎坑咩,可唔可以俾荀盆我揀?)

我:「……」

老細:「即係未入屋睇過啦!你怕有「鹹魚」,定溶咗你?聽你咁講依間已經唔算垃圾屋,你都未見識過垃圾屋。」

我:「之前搵唔到大叔,都驚佢喺變「鹹魚」,雖然啲味唔似「鹹魚」,但係企喺𨋢堂都聞到有臭噏味。有個婆婆仲定期用漂白水洗,洗到啲走廊地磚都白晒,都唔知話唔話佢好。」

老細:「你怕俾人溶就搵保安陪,總之,入屋睇咗先講。散會。」

忙L咗幾日加上心理難關,極度想逃避大叔但係見少婦咁慘就「點都要會一會佢」,而且再係咁搞落去都唔L係辦法,其他單位都會投訴,所以今朝「的」起心肝打大佬!

(戰戰競競同保安叔叔去「拍門」打大佬。)

毒L大叔出嚟應門已經「起晒鋼」怒啤我哋,覺得我、管理處同埋鄰居都針對佢,又話講唔出喺咩臭味又無point ,拒絕我哋入屋了解……我唯有曲線咁講係誤會,我哋做緊樓層嘅家訪,想問下會唔會見到有小強出沒同埋聞到臭味?。

(心暗:DDLM ,知咩臭味我就唔駛入嚟了解啦!)

講咗一輪,最後都只俾我一個入屋望一望,但係唔俾我影相留檔,而保安叔叔就企係門口昅住。其實望落環境都叫整齊,但鐵閘、廚房同廁所都好多鐵鏽同污漬,附近啲木地板又黑又濕……懷疑存放大量報紙吸引小強,加上廁所渠位失修所以傳出傳出臭味……

最後,毒L大叔佢死都唔認有臭味,但認有小強出沒,仲俾我睇用剩嘅殺蟑粉。唯有再曲線提醒佢定期倒漂白水落渠位,減少小強出現。

 

後記:臨走時見到小強係大門爬過同我say bye ,真係DLLM 。搞到我放工即9衝返屋企沖涼。

後後記:單位屬私人地方所以唔俾入屋同影相,你都吹佢唔漲。除咗出通告、勸喻同埋加強清潔,其餘嘢我哋就無能為力。

 

作者:六月的物管

真係做左六個月物業管理

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 194971
Date: 2019-06-06 05:08:18
Generated at: 2020-10-30 07:03:22
Permalink: https://www.vjmedia.com.hk/articles/2019/06/06/194971/少婦胸接小強,大驚變潑婦喪投訴鄰居污糟養曱甴