【塔羅個案】原來而家時下遲到嘅道歉方式,居然係講呢一句?

文教 / 最新文章綜覽

 

今次呢個故事,令我前幾日哭笑不得左好耐。

我係一個好注重時間嘅人,所以我一向要求客人盡量準時。當然,人生仲有大量突發事情,例如臨放工老細拉住你廢話、起身無啦啦腸胃炎發燒感冒、行行下對三吋高根鞋甩左個踭……意外嘅人,誰人都有,最緊要係你同我講聲,做到比你我一定做。

點解遲到唔得?我每個客都預左一定時間,然後下個客就會黎到,理想當然係做到無縫交接,你夠時間講之餘,後面個客又唔駛等;如果你遲到,影響下一個準時嘅客,當然亦唔係最理想嘅狀況。

夜晚放工,過海多人,老細開會遲左,呢啲原因令到客人於繁忙時間要遲少少或者改期,我都可以理解(雖然大部份人都非常準時,多謝你地)

但係,如果你本身嗰日放假瞓晏左呀、行街睇影食飯 High Tea 無睇時間呀,好遺憾,我寧願蝕一個客嘅 Slot 錢,或者將你嘅時間豪埋比下一個客,我都唔會接受嗰啲老馮消費者式要求,例如:

「剪頭髮耐左,我整完你比個時間我?」

或者本身已經遲左幾乎半個鐘、已經比助手 Cancel 左 Booking 嘅客,喺一個鐘後先短訊話:
「瞓醒(馬騮掩眼 Emoji)遲左少少,而家起身過黎,你預我遲多兩個鐘?」

呢啲,真係唔好意思,我托賴生意叫唔錯,好少會兩粒鐘條條 Fing 無野做的,幫你唔到啦 Bye Bye。

我相信好多朋友同我一樣,對於時間非常注重。我前排有個做 HR 嘅客人,公司係咁見緊新嘅 Applicants,因為見嘅人都多,所以時間排得都幾 Tight。

有一個後生仔,原本安排左 14:30 見工,佢 14:18 打比我個客話塞緊車會遲少少,結果去到 15:35 先黎到見工。我個客本身已經躁躁地,「你遲左成個鐘喎。」

然後,呢個後生仔嘅回應係。

「對唔住呀,唔熟路,唔好嬲,Pika Pika!」附加一個「喂你唔好咁啦我認衰囉」嘅表情。

我聽到呢度,笑到差啲噴返啖水出黎,我個腦閃過某篇比卡超潮文,頂,好有畫面。

「你仲笑!」

HR 客其實自己都笑緊,但係我明,如果當時我係佢嘅身份,除左轆大對眼,都唔知比咩反應佢好。鬧佢?喂佢又唔係無禮貌,頂多都係 Odd 啲同埋唔知做乜勁,嗯……我覺得我真係好厚道。

最後呢個 Pika Pika 客當然就好快比呢間公司 Dismiss 左啦,無啦,阿仔太有幽默感啦,呢啲咁平板嘅金融公司唔適合佢,各散東西都係一件好事。不過,我反而好想知,係一個點樣嘅人,先可以去大公司見工遲到仲要敢同 HR 講 Pika,定還是而家興咁樣?

唉我好 Out。不過,聽完呢個故事之後,我全個占卜過程係咁同我個客講 Pika Pika,哈哈。

 

【塔羅牌個案分享】

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195003
Date: 2019-06-07 01:06:39
Generated at: 2019-09-19 05:27:41
Permalink: https://www.vjmedia.com.hk/articles/2019/06/07/195003/【塔羅個案】原來而家時下遲到嘅道歉方式,居然