自製乳酪經驗分享

 

 

自從開始左自製乳酪後,我就開始左養蠱式嘅種菌實驗,並以自己作為實驗品。神乳氏嚐百菌後,希望分享經驗,令大家他朝喺文明沒落,手執一罐午餐肉就有西吊之時,都可以一嚐乳酪滋味。

 

一、製作方法(一升乳酪):

拎一個可以耐熱嘅容器,注入900毫升牛奶,再加入6至8羹現成含活性菌嘅乳酪(如果你一次過整更多就按每一升奶落八羹乳酪嘅比例)。扭緊蓋後再將成樽奶菌mixture 嘅容器擺入另一個更大、可扭實、並可以保溫嘅大桶(類似賣碗仔翅小販用嗰種紅A 紅白厚膠提桶),以蒸架墊底以保證奶可以平均受熱,再倒入滾水,關蓋,發酵八至十小時。最少六小時,否則太過流質;但建議不多於十二小時,以免乳酪成品太硬。

完全後會有少量微黃色透明液體浮面,曰乳清,味稍酸,但含豐富益生菌,可調味飲用或稀釋作美容用。

 

二、乳酪香味:

乳酪香味取決於牛奶質素。牛奶脂肪含量越高,製成品嘅奶香就越重。所以如果你怕肥而堅持用脫脂奶整嘅話就不如收皮。用日本4.3牛乳整出嚟嘅製成品馥郁芳香,適合製作 lasi之類飲品;但平衡性價比後,以3.6 牛乳製作嘅乳酪香味亦不俗。至於價真棧嗰啲十蚊奶,或許美國農業工業化下啲牛泵奶泵得唔開心,製作出嚟嘅乳酪香味同味道都冇日本奶咁好。

 

三、乳酪酸味:

乳酪酸味取決於菌種。其實惠康最平嗰種維記(大盒嗰隻)都唔差,配3.6 或4.3 都幾好,但少少偏酸。其實現成乳酪買返嚟開封見到多乳清嘅話,用之作菌種嘅製成品自然亦會多乳清,虎父無犬子。

製作乳酪用嘅菌類多樣,唔止得一種,每種菌整出嚟嘅味道都會有少少唔同。大家可以買幾款撈嚟試,食雜啲冇死。

另外請注意菌種乳酪嘅成份,當中凝固劑會影響口感。最好都係買返無添加嘅乳酪做種。

 

四、保存方法:

擺落雪櫃,但咪冰佢。放室溫會滋生其他可能令你疴嘅細菌,並且令乳酪變酸。

 

作者:亂臣賊子

亂臣賊子

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 195096
Date: 2019-06-09 04:48:37
Generated at: 2019-09-18 10:02:33
Permalink: https://www.vjmedia.com.hk/articles/2019/06/09/195096/自製乳酪經驗分享