身為一個花生友，天下大亂係最好睇，有大戲睇，點都好過睇埋曬啲飯民與政府互X 嘅小電影。
今日有人廣傳叫人星期二三「罷工」，如果真係發生，我都好想睇。
不過慘嘅係，好似好多人誤會左咩係罷工。
首先講罷工唔係乜。
罷工唔係請假。
罷工唔係唔開一兩日工。
罷工唔係驚同事做埋你嗰份辛苦曬。
咁罷工係乜？
如果你嘅罷工對象係老闆，你嘅罷工訴求係加人工唔OT 之類嘅工人權益，咁你地罷工嘅效果，就係要令到個企業運作唔到。
點為知運作唔到？舉例咁講，如果你做製衣廠，你負責操作部紡紗機，你係要熄左部機先離開工作崗位，同埋唔會再有其他人可以去到你嗰個工作崗位，部紡紗機開唔到，咁就無紗線供應俾織布機，咁成個製衣廠就運作唔到。
其他工作崗位，只要你係一個關鍵嘅位置，停左佢，唔俾人做，都有相同效果。
所以點解工會成日講「團結」，就係得你一個停，無用嘅，你停左，仲要其他人補唔到。所以你嘅位置要係關鍵，個關鍵嘅意思唔一定係話乜嘢管理層，而係有足夠關鍵令個生產停左；又所以，要有罷工糾察隊，阻止其他人返工。
咁全港大罷工即係點？
即係你嘅罷工對象係個社會，係個制度，你罷工嘅效果，係要令個社會運作唔到。
點為之個社會運作唔到？
如果你做送外賣，你罷工，sorry，我食少三年外賣都唔會死，我可以去堂食。
如果你開餐廳，你罷工，sorry，我出少三年街食都唔會死，我可以自己煮。
相反，再數落去，就會發現，關於飲食，真係有啲位係好關鍵。
做貨櫃碼頭呢？做口岸呢？渣貨櫃車呢？呢啲位置罷工，唔係街市唔開我幫襯超市嘅隻，就真係會令我餓死。乜嘢叫罷工睇返上面，除左你唔揸貨櫃，仲要令其他人揸唔到貨櫃。
再數落去：
你做耀才證券，你罷工無人會care，但成個香港交易所運作唔到，就係一件事。
你做水電，你罷工無人會care，但發電廠運作唔到，就係一件事。
你做港鐵黃背心，你罷工無人會care，但地鐵開唔到車，就係一件事。
如果大家真心想罷工，應該喺你嘅行業，上至下都連結到，然後達到癱瘓成個公司運作，或者癱瘓香港運作，咁先係罷工，而唔係曠工，well，更加唔係請假。
利申唔會罷工，利申無工返廢老，利申賤人，利申而家飲緊咖啡食緊意粉。
【塔羅個案】學校老師唔交人鍊學生名單就會無左份工，但佢堅持唔交
【愛情實況系列】才子第一次約女仔就去行山，能唔能夠結束三十幾年青頭生涯？
公主病嘅人真係好難頂
【外賣仔日記】張單$568，不如我俾$602 你，你找返$40 俾我吖？
多年之後，我終於真正明白，點解阿媽當年教我被人蝦就直接打返轉頭。
男Client 話佢無拍過拖，係因為所有女人都貪錢同貪靚仔（上）
2019年6月10日
